Засега нема нови жаришта на болеста африканска чума кај свињите во земјава, а последниот забележан случај е на 12 август месецов во Облешево. Сепак, институциите ги спроведуваат мерките во заштитните зони од 3 километри околу постојните жаришта на болеста и досега се убиени и нештетно отстранети 1.305 свињи. За ова денеска информираше Агенцијата за храна и ветеринарство (АХВ), по одржаниот состанок на Координативното тело за справување со африканската чума кај свињите.
Формирани се заштитни зони од 3 километри и зони под надзор во радиус од 10 километри околу жариштата каде се појавила болеста и засега надлежните институции без проблеми ги спроведуваат наредените мерки согласно Решенијаta на АХВ и утврдената динамика.
„Мерките за активен и пасивен надзор на болеста африканска чума кај свињите се спроведуваат на целата територија на државава“, истакна директорот на АХВ Николче Бабовски објаснувајќи ја моменталната состојба со болеста во земјава.
За да се стави под контрола ширењето на вирусот и да се спречат економските загуби на одгледувачите на свињи, особено на комерцијалните фарми, додаде тој, неминовно е да продолжи соработката во спроведувањето на мерките од страна на институции.
Донесен е заклучок, Агенцијата за храна и ветеринарство и Министерството за земјоделство, шумарство и водостопанство (МЗШВ), во најкус можен рок до Владата да предложат формирање на Интервентен наменски фонд со предлог буџет, со цел брзо и навремено спроведување на мерките за контрола и искоренување на африканска чума кај свињите.
На состанокот е заклучено Ловечката федерација да преземе мерки за итна максимална депопулација на дивите свињи како резервоар на вирусот на болеста на територијата на целата земја, со посебен приоритет на регионите кои граничат со регионите под заштита и надзор, во временски период од 01.09.2022 до 30.04.2023 година. Паралелно со засилениот отстрел, ќе треба да се изврши и пребарување на теренот за пронаоѓање на угинати диви свињи.
Царинската управа, додаде Бабовски, согласно заклучокот на координативното тело, на граничните премини и на аеродромите треба да ги интензивира контролите на личниот багаж на патниците при влез во државата и на дневна основа да ја известува Агенцијата за храна и ветеринарство за количината и видот на запленетите производи од животинско потекло, како и истите нештетно да ги отстранува.
