Синоќа во сообраќајна незгода на патот Охрид – Св.Наум дошло до судир на три возила „Цитроен Ц3“, со битолски регистарски ознаки, управувано од 27-годишниот И.К. од Битола, „Голф“, со охридски регистарски ознаки, управувано од А.А.(23), од охридското село Лескоец и „Фолксваген Пасат“, со прилепски регистарски ознаки, управувано од Б.А.(26) од прилепското село Мало Коњаре, соопштија од Секторот за внатрешни работи во Охрид.
Како што информираат оттаму, од здобиените тешки телесни повреди, И.К. во болницата „Св. Еразмо“ им подлегнал на повредите, а со тешки телесни повреди се здобиле и сопатниците во истото возило: М.С.(27) од Битола и И.М.(23) од Струга, констатирани во Комплекс клиники „Мајка Тереза“ во Скопје, каде биле пренесени и уште едно лице од Битола, кое е пренесено во болницата „Св. Еразмо“ во Охрид.
„Сопатничката во истото возило Д.Р.(25) од Скопје, се здобила со телесни повреди, констатирани во болницата „Св. Еразмо“. Во истата болница за укажување на лекарска помош е пренесена и Б.Р.(23) од Охрид, сопатник во возилото „Голф“, додека по укажана лекарска помош, на домашно лекување се пуштени возачот на „Голф“ А.А. и сопатникот Б.К.(24) од Охрид“ појаснуваат од СВР Охрид.
Полициски екипи заедно со Јавен обвинител и судски вештак извршиле увид на самото место за утврдување на причините и околностите што довеле до несреќата.
