Основното јавно обвинителство Скопје до надлежниот суд поднесе предлог за издавање казна од 10.000 евра за поранешната директорка на ЈЗУ Клиника за дерматовенерологија при Универзитетскиот клинички центар „Мајка Тереза“ – Скопје, која е обвинета за кривично дело – Пренесување заразна болест. Обвинетата зарази 7 свои колеги со оваа болест уште пред да биде хоспитализирана со позитивен наод на Ковид-19.
Директорката која на 29 февруари се врати во државава од Италија, не ги почитувала мерките и заклучоците на Владата, односно по враќањето од високо ризична земја со зголемен број на Ковид-19 позитивни лица, не останала во 14 дневна домашна изолација. Како здравствено лице, била свесна за ризикот но продолжила со своите работи обврски на Клиниката, а на 7 март присуствувала и на симпозиум со што ги довела во опасност сите присутни.
По откривање на случајот, директорката беше разрешена, а во домашна изолација беа 64 вработени од клиниката кои имале контакт со неа.