Градот Скопје ги извести граѓаните дека поради намалените вредности на загадувањето на воздухот се укинуваат вонредните мерки и интервентните препораки за намалување на загадувањето на воздухот што беа воведени вчера.
Градоначалникот Петре Шилегов потврди дека од утре ќе се укине бесплатниот автобуски превоз кој ќе се наплаќа според постојната тарифа.
– Мерката ќе важи денеска, а од утре се враќаме во редовниот режим на функционирање имајќи предвид дека се изменети климатските услови кои доведоа во воведување на вонредните мерки. Станува збор за мерки за кои имаме прецизно утврдени нормативи кога ќе се применуваат и секогаш кога ќе бидат исполнети условите, овие мерки ќе се применуваат – рече Шилегов.
Градоначалникот рече дека граѓаните не ја искористиле вонредната мерка за бесплатен јавен превоз, но, како што посочи, има разбирање за тоа, бидејќи концептот за јавен градски превоз е сосема погрешен.
Од Град Скопје потенцираат дека мерките и препораки ќе се воведат повторно доколку се повтори загадувањето на воздухот, а за тоа граѓаните ќе бидат навреме информирани.
