Посетата на албанскиот премиер Еди Рама на Белград претставува важен чекор во напредокот на односите меѓу Албанија и Србија, оцени еврокомесарката за надворешна политика Федерика Могерини.
„Ги пофалуваме двајцата лидери за нивната политичка храброст за одржување на посетата, која по својата природа е чувствителна и претставува предизвик“, се наведува во соопштението објавено на интернет-страницата на ЕУ по повод посетата Еди Рама на Србија.
„Посетата ја гледаме како нова фаза во односите меѓу двете земји и се надеваме дека двајцата лидери и понатаму ќе ги градат врз основа на посетата за да обезбедат преземање на натамошни позитивни чекори“, се додава во соопштението.
Портпаролката на високата претставничка Федерика Могерини, Маја Коцијанчич, денеска во Брисел на новинарите во Европската комисија повторно им истакна дека посетата на албанскиот премиер Еди Рама треба да донесе пресврт во односите меѓу Србија и Албанија и оти лидерите на двете држави покажале нова решеност за обнова на врските.
