!На 1 февруари 2017 година, заврши промотивниот период на слободно користење на содржините на „Мета“. Во периодот што претстои го воведуваме новиот систем за пристап и за претплата. За начинот на пристап и за претплатата ќе информираме дополнително

Радев ќе бара ЕУ да се ангажира во Македонија, Борисов разговарал со Иванов, Груевски и со Заев


Софија, 28 април, 2017 - 16:49 (META) 

Бугарија ќе настојува ЕУ повеќе да се ангажира за Македонија и да има јасна перспектива за иднината на сите земји од Западен Балкан, изјави денеска претседателот на Бугарија, Румен Радев, при посетата на авиобазата „Граф Игнатиево“, известуваат бугарските медиуми.

Радев порача дека решението за Македонија треба да се бара во рамките на ЕУ и на НАТО и рече оти претпоставува дека на утрешната средба на лидерите на членките на ЕУ ќе се постави и тоа прашање и нагласи дека случувањата на Македонија не придонесуваат за стабилноста на регионот.

– Тоа не е начин да се управува една држава. Недозволиво е парламентот да се претвора во борбен ринг – порачува Радев.

Во меѓувреме и мандатарот за состав на новата влада на Бугарија, лидерот на ГЕРБ, Бојко Борисов, порача оти е растревожен од случувањата во Македонија и се надева дека ќе се најде политички излез.

– Синоќа разговарав со претседателот на Македонија, на негово барање. Се јави Никола Груевски, а исто и Зоран Заев. Како и сите, и јас сум растревожен од тоа што се случува во Македонија. Многу внимателно, без никакво мешање во внатрешните работи, ги повикав сите да најдат политички излез од кризата. Таа тлееше со години – рече Борисов.

Тој вели дека емоциите на лидерите на партиите треба да бидат на второ место, затоа што зад нив има многу луѓе.

– Гледате дека омразата е голема. Се надевам дека ќе се најде политички излез и се залагам за тоа. Македонија ни е особено важна, треба да ја сочува целовитоста и да продолжи по патот на евроатлантските интеграции – порача лидерот на ГЕРБ.

Борисов вели дека ЕУ очекува Македонија да ги исполни критериумите и посочи дека целовитоста на Македонија и нејзиниот пат кон ЕУ и НАТО се од животна важност за Бугарија.

-Ги повикувам да покажат разумност и да го направат тоа што е потребно за да се смири Македонија и тие да си ја завршат работата, оти сите во Европа чекаме тие да ги исполнат критериумите – порачува идниот премиер на Бугарија.


Радев: Имаше обид за влијанија однадвор врз изборните резултати


Софија, 12 април, 2017 - 9:47 (META) 

Во текот на кампањата партиите повикуваа на крајни мерки, спротивни на сегашните закони, вклучувајќи напуштање на принципот на двојно државјанство, затворање на гласачки места и затворање на границите. По изборите темата беше бргу погребана, забележа бугарскиот претседател Румен Радев во своето прво обраќање кон нацијата.

– Но проблемите остануваат. Тие проблеми не се состојат само во надворешни влијанија во избирачкиот процес, туку и со смислени обиди за систематско и длабоко навлегување и влијание врз општеството и политичкиот живот на земјата. Проблемите нема да бидат решени со ветувања, туку со закони – категорично порача бугарскиот претседател.

Тој се осврна и Бугарите надвор од границите на Бугарија. Најважната заштита на Бугарите надвор од земјата, според претседателот, е нивното право да може да се вратат во независна и суверена Бугарија.

После години негрижа за националниот суверенитет, поради неодговорност, меѓупартиски пресметки и кусогледо законодавство, денеска се неопходни одговорни и ефикасни дејствија: законодавски и организациски. На следното 44-то Народно собрание лежи одговорноста да најде решение за тие проблеми, потенцираше Радев во првото обраќање кон нацијата.

Шефот на државата ги поздравува „храброста и напорите на Министерството за правосудство да формулира конкретни предлози за законски измени“. Тие опфаќаат не само промени во изборното право, туку и клучни промени во други закони, чија цел е зацврствување на расклатениот имунитет.

-Предлозите за промени на законите за вероисповеста, за политичките партии и за бугарското државјанство ставаат цврст бедем пред дејствијата насочени против нашата независност, интегритетот на државата и општеството – потцрта Радев.

Последните предлози, меѓутоа, не останаа надвор од фокусот на општествената дебата.

-Дебатата ја извади политичката класа од долгогодишната летаргија на таа тема. Верувам дека во еден разумен и конструктивен дијалог ќе се најдат подобри решенија. Тие треба да ја почитуваат и нашата припадност во европското семејство. Кога зборуваме за права и обврска, треба да ги споредуваме со далеку построгите ограничувања во редица држави од Европската Унија, кои за нас се еталон за демократија – рече Радев.

 


Радев: Не можеме да ја браниме Европа без Шенген


Софија, 7 февруари, 2017 - 17:04 (META) 

Бугарскиот претседател Румен Радев истакна дека Бугарија ги прави сите напори за да ги заштити нејзините надворешни граници и да ги заштити сите европски граѓани.

Радев рече дека земјата се потпира на „поголема посветеност на сите земји членки на ЕУ“ во случај на засилување на мигрантскиот бран.

– Исто така, Бугарија се потпира на поддршката на други земји за членството во Шенгенската реадмисија на илегални мигранти од територијата на земјата – изјави Радев на заедничката прес-конференција со германскиот претседател Јоаким Гаук во Берлин.

Бугарскиот претседател рече дека исполнети се сите технички барања за членство во шенгенската зона и дека земјата докажала дека ги штити надворешните граници на Европа по сите критериуми на Шенгенскиот договор.

Радев изјави дека ова не може ефективно да се случи ако Бугарија нема пристап до визниот информациски систем и до системот на информации на Шенгенскиот договор, додавајќи дека недостигот од пристап до овие системи го зголемува ризикот за сите европски граѓани.

Германскиот претседател Гаук рече дека е важно да се земе предвид дека Бугарија активно учествувала во заштитата на надворешната граница на Европа.


Радев ги закажа вонредните избори во Бугарија за 26 март


Софија, 24 јануари, 2017 - 20:28 (META) 

Претседателот на Бугарија, Румен Радев, денеска распиша вонредни парламентарни избори, што ќе бидат одржани на 26 март, а дотогаш функцијата премиер ќе ја извршува поранешниот претседател на бугарското собрание, Огњан Герџиков, соопштија од кабинетот на бугарскиот претседател.

В петок, како што е најавено, Радев ќе го распушти парламентот.

Седумдесетгодишниот Герџиков беше претседател на бугарското собрание од 2001 до 2005 година, а во моментов е професор по право и претседател на арбитражен суд.

Радев, кој стапи на функција овој месец, мораше да распише предвремени парламентарни избори бидејќи владата предводена од Бојко Борисов поднесе оставка откако нивниот претседателски кандидат ги изгуби изборите.


Радев: ЕУ и НАТО се стратешки избор на Бугарија, кој не треба да се проблематизира


Софија, 19 јануари, 2017 - 20:03 (META) 

Членството во Европската Унија и во НАТО е стратешки избор на Бугарија кој не треба да се доведува во прашање, рече денеска новиот претседател на земјата, Румен Радев, во својот говор по положувањето заклетва во бугарскиот парламент.

„Ефективното членство значи јасно разбирање и постајно бранење на националните интереси во двете семејства кои се вклучени во создавањето на заедничките вредности. Бугарската надворешна политика треба да се формулира внатре во земјата и на неа да се опстојува надвор, а не обратно, таа треба да биде отворена кон светот и да создава нови пријатели и партнери, а не непријатели“, рече Радев, пренесува БТА.

Новиот бугарски претседател рече дека сè повеќе се зголемува антиевропското расположение, но нагласи дека „обединета Европа треба да биде зачувана по секоја цена“ и дека спротивното би значело „изгубено време“.

Радев ја коментираше и кризата во релациите меѓу ЕУ, НАТО и Русија, истакнувајќи дека „Студената војна е тажно искуство од минатото“ и дека „меѓусебните конфронтации не се начин за решавање на кризата“.

Според него, новата политичка ситуација во светот дава можност за решавање на проблемот со дијалог, а резултатите од изборите во САД се надеж за воспоставување дијалог со Русија.


Румен Радев е најпопуларен бугарски политичар


Софија, 10 јануари, 2017 - 10:40 (META) 

Румен Радев има најголем рејтинг помеѓу бугарските политичари и на последната анкета освои 35 отсто поддршка. Бојко Борисов е втор со 25 отсто поддршка, а Каракачанов е на трето место со 19,9 отсто.

Новоизбраниот претседател води во сите социјални групи. Најмало водство има кај жените и оние со факултетска диплома, каде што рејтингот на тројцата политичари е многу блиску.

Претседателот Росен Плевнелиев има 8,5 отсто поддршка, Веселин Марешки освоил 6,4 проценти, а Валери Симеонов – 5 отсто.

Во категоријата на луѓе постари од 60 години и кај државните службеници, Каракачанов води пред Борисов со осум поени, но и во двете групи доминантен е Радев.

Ова го покажува анкетата направена од Европскиот институт за стратегии и анализи и Европската лига за економска соработка. Истражувањето било направено „лице в лице“ во сите делови на земјата.


Предвремените парламентарни избори во Бугарија ќе се одржат напролет


Софија, 21 декември, 2016 - 18:09 (META) 

Право и обврска да закаже конкретен датум за предвремени парламентарни избори и за формирање влада, има новоизбраниот претседател Румен Радев, изјави бугарскиот претседател во заминување Росен Плевнелиев, јавува дописничката на „Мета“ од Бугарија.

Тоа би значело дека до 22 јануари останува владата во оставка на Бојко Борисов.

Според зборовите на претседателот, создавање на две влади е ризично решение бидејќи е симбол на поделба. Тој додаде дека за да нема никакви шпекулации дека сака да го продолжи мандатот на владата во оставка, подготвен е во секој момент да соработува со новоизбраниот претседател Румен Радев за да се состави новата влада.

– За жал, секогаш кога се поставува прашањето за избори, преовладуваат теснопартиските интереси. Во мојот мандат, се уверив дека треба да се држиме до уставот. Најдобро е да имаме една непречена транзиција, од редовна кон службена, па кон формирање нова влада – изјави Плевнелиев.


Радев: Бугарија не треба да ѝ биде непријател на Русија


Софија, 14 декември, 2016 - 19:05 (META) 

Новоизбраниот претседател на Бугарија, Румен Радев, во интервју за францускиот весник „Ле Монд“ потврди дека ќе се залага Бугарија, како полноправна членка, да продолжи да работи во рамките на интересите на Европската Унија и на НАТО, но и дека е против санкции кон Русија.

Педесет и тригодишниот Радев, кој е поранешен генерал на бугарските воздухопловни сили, а беше избран за претседател со поддршка на бугарската социјалистичка партија, официјално треба да ја преземе функцијата на 22 јануари следната година.

„Имаше обиди да бидам дискредитиран за време на изборната кампања, но заедно со Илијана Јотова (заменик-претседател, н.з.) ја браниме јасната позиција дека Бугарија е лојален член на НАТО и на ЕУ. Историски и културолошки, Бугарија секогаш била дел од Европа. Земјата избра стабилен и одржлив пат за проевропски развој и ние нема да го напуштиме тој пат. Ние сакаме да се етаблираме како сигурен партнер на НАТО. Но, тоа не значи дека Бугарија треба да ѝ биде непријател на Русија, со која имаме значајни економски интереси“, вели Раде во интервјуто.

Прашан зошто се залага за кревање на санкциите против Русија, Радев вели дека санкциите не се решение.

„Тие ѝ штетат на Русија, но исто така и на Европската Унија. За силните економии ова не е проблем, но за кревките економии како што е бугарската, тоа претставува проблем“, посочува новоизбраниот претседател на Бугарија.


Договорот за добрососедство не треба да биде пречка за односите со Бугарија, оцени Иванов


Софија, 22 ноември, 2016 - 14:35 (META) 

Претседателот на Република Македонија, Ѓорге Иванов, денеска во Софија се сретна со бугарскиот претседател во заминување, Росен Плевнелиев, и со новоизбраниот претседател на Република Бугарија, Румен Радев.

На средбите, како што соопштуваат од кабинетот на Иванов, било заклучено дека договорот за добрососедство меѓу Македонија и Бугарија не треба да биде пречка за развојот на билатералните односи, бидејќи станува збор за две пријателски и соседни држави, кои ги поврзуваат многу нешта од минатото и кои имаат заедничка иднина.

– Договорот меѓу нашите две земји сè уште не е завршена работа. Поминаа многу години во обиди да се изедначи текстот, бидејќи се настојува да постои симетричност во него и двете страни на некој начин да бидат задоволени – изјави Иванов по средбите.

Тој изрази надеж дека со изборот на новата влада и од бугарска страна, конечно ќе се решат некои ситни дилеми кои се состојат во зборови и во нијанси на формулации, со што ќе се заврши долгиот процес на усогласување.

– Бугарија е петти трговски партнер на Македонија. Без изградена инфраструктура, без автопати, без изградена пруга сме постигнале така висока трговска размена и тоа влијае на нашите две стопанства, на нашите граѓани и на блиските односи меѓу институциите – рече Иванов.

Тој посочил дека со своите бугарски колеги бил и останува отворен за соработка.

– Кога ќе имате разговор и дијалог, можете да дојдете до решение. И сепак, личниот однос, повторувам, е секојпат оној што ги отвора сите врати – посочил претседателот Иванов.

????????????????????????????????????

Ѓорге Иванов и Румен Радев

На средбата, Иванов му посакал успешен мандат на новоизбраниот претседател Радев и го поканил во официјална посета на Македонија.

– Се надевам дека посетата ќе се оствари и дека тоа дополнително ќе ги поттикне и ќе ги зацврсти односите што веќе ги имаме – истакнал Иванов, кој ја оценил работната посета на Бугарија како успешна.
На средбите станало збор и за претстојните избори во Македонија и во Бугарија.

– Нè очекуваат избори, треба да избереме ново собрание, нова влада, веројатно веќе напролет и во Бугарија се очекуваат избори, ќе треба и тие да изберат ново собрание и се надеваме дека новите влади и новите министри ќе ги продолжат сите овие работи што досега сме ги имале и многу прашања ќе бидат затворени – рекол Иванов.

Македонскиот претседател, исто, така посочил дека БАН и МАНУ се пример како две институции кои се во науката треба да пристапат за сите прашања кои ги оптоваруваат односите меѓу нашите две земји.

Прогласувањето за почесен доктор на науки од страна на Бугарската академија, како што рече Иванов, е плод на таа соработка, но и на стекнатата доверба во работењето на двете академии.

– Јас сум добивал многу признанија, но кога тоа доаѓа од сосед, има особена тежина и значење – нагласил македонскиот претседател.


Иванов во работна посета на Бугарија, ќе биде прогласен за почесен доктор на науки


Скопје, 20 ноември, 2016 - 12:33 (META) 

Претседателот Ѓорге Иванов ќе престојува во работна посета на Бугарија, утре и задутре (21 и 22 ноември).

Утре, Иванов ќе ја посети Бугарската академија на науките во Софија, каде ќе се сретне со академик Стефан Воденичаров, претседател на Бугарската академија на науки, и ќе одржи предавање на тема „Миграциите и мигрантите: предизвици за третиот милениум“.

На свечена церемонија, Бугарската академија на науките на претседателот Иванов ќе му ја додели титулата почесен доктор на науки.

На 22 ноември (вторник) претседателот Иванов ќе оствари средби со претседателот на Бугарија, Росен Плевнелиев и со новоизбраниот претседател, Румен Радев, на кои ќе биде разговарано за севкупните билатерални односи меѓу двете земји и можностите за унапредување на билатералната и регионалната соработка.