Илон Маск успешно ја лансираше ракетата „фалкон хеви“


Вашингтон, 7 февруари, 2018 - 10:41 (META) 

Основачот на компанијата за електрични автомобили „Тесла“, Илон Маск, успешно ја лансираше ракетата „фалкон хеви“ од вселенската станица „Кенеди“ на Флорида, јавуваат светските медиуми.

Ракетата се одлепила од земјата без никаков инцидент, а во неа се наоѓа и спортскиот електричен автомобил „роудстер“ (Roadster) на компанијата „Тесла“ .

„Роудстер“ ќе отиде 400 милиони километри подалеку од Земјата и ќе се движи со брзина од 11 километри во секунда“, изјави Маск на прес-конференција.

Се проценува дека автомобилот ќе кружи во вселената неколку милиони години. Маск изјави дека на автомобилот се бидат закачени три камери кои би требало да обезбедат „епски поглед“.

На возачкото седиште е куклата „стармен“ (Starman), а во автомобилот е пуштена песната „Space oddity“ од Дејвид Боуви.

Компанијата на Маск, „Спејс екс“ наведува дека ракетата „фалкон хеви“ може да понесе 64 тони, што е повеќе од „боинг 737“ со патници, персонал, товар и гориво.


Северна Кореја тестираше уште една ракета над Јапонија


Пјонгјанг, 15 септември, 2017 - 10:18 (META) 

Северна Кореја испукала уште еден проектил од близината на Пјонгјанг. Американците и Јужнокорејците ги анализираат податоците од оваа проба. Јапонија тврди дека една ракета го прелетала островот Хокаидо, а потоа паднала во Тихиот Океан.

Јужнокорејскиот совет за национална безбедност одржа итна седница веднаш откако беше објавена веста за новиот ракетен тест на режимот во Пјонгјанг.

Јапонскта телевизија НХК објави дека проектил го прелетал островот и се урнал во Тихион Океан, околу 2.000 километри источно од брегот на Јапонија.

Ракетата е лансирана еден ден откако Пјонгјанг се закани дали ќе ја „потопи“ Јапонија и во САД ќе донесе „пепел и мрак“ поради новата поддршка на пакетот санкции на Советот за безбедност на ОН против Северна Кореја.

Претходното тестирање проектили, Пјонгјанг го изведе кон крајот на август, кога севернокорејска ракета исто така прелета над Хокаидо пред да се урне во океанот.


Американски бомбардери изведоа вежба во близина на Северна Кореја


Сеул, 31 август, 2017 - 12:57 (META) 

Американските стратешки бомбардери, кои можат да носат нуклеарно оружје, изведоа заедничка вежба со јужнокорејските сили во близина на источниот брег на Јужна Кореја.

Војската на Јужна Кореја соопшти дека станува за вежба во која учествуваат два американски бомбардери „Б-1Б“ и четири „Ф-35“ како и јужнокорејските бомбардери „Ф-15“.

Северна Кореја потврди дека во вторникот лансирала ракета која ја прелетала Јапонија и дека ги погодила целните води во Тихиот Oкеан. Лансирањето на ракетата со среден домет ја надгледувал севернокорејскиот лидер Ким Џонг-ун, кој информираше дека ќе има лансирање на повеќе балистички ракети.


Цената на златото се зголеми откако Северна Кореја истрела ракета кон Јапонија


Пјонгјанг, 29 август, 2017 - 13:55 (META) 

Цената на златото се приближи до највисокото ниво за годинава, откако Северна Кореја истрела балистичка ракета кон Јапонија.

Овој настан ги поттикна инвеститорите на сигурно инвестирање, поради зголемување на тензиите помеѓу Пјонгјанг и САД и сојузниците.

Цената на златото оваа година се зголеми за 15 проценти, остварувајќи пораст секој месец.


Северна Кореја истрела ракета преку Јапонија, итна седница на Советот за безбедност на ОН


Пјонгјанг, 29 август, 2017 - 10:45 (META) 

Советот за безбедност на Обединетите нации (ОН) денеска ќе одржи итна седница на барање на САД, Јапонија и на Јужна Кореја, откако Пјонгјанг истрела балистичка ракета што ја прелета територијата на Јапонија пред да падне во Тихиот Океан.

Како што јавуваат светските медиуми, сирените за тревога се активирале во северниот дел на Јапанија, предупредувајќи ги луѓето да побараат засолниште, а железничкиот транспорт бил прекинат.

Јапонскиот премиер Шинзо Абе денеска изјавил дека во текот на 40-минутниот телефонски разговор со американскиот претседател, Доналд Трамп, се согласил да се засили притисокот на Северна Кореја.

Тој истакнал дека потегот на Пјонгјанг претставува „сериозна закана, без преседан“.

Истовремено, Северна Кореја поднела жалба до Советот за безбедност на ОН поради заедничките воени вежби на САД и на Јужна Кореја, наведувајќи дека таквите акции се провокација во екот на тензиите на Корејскиот Полуостров.

Советот за безбедност на ОН на почетокот на август усвои резолуција која предвидува воведување на нови, поостри санкции кон Северна Кореја, откако Пјонгјанг во јули истрела интерконтинентална балистичка ракета, втора по ред.

Северна Кореја претходно се закани дека би можела да истрела ракета кон американскиот остров Гуам во Пацификот, на што претседателот на САД, Доналд Трамп, изјави дека во таков случај Пјонгјанг ќе се соочи со „оган и бес“.


Кина го прекинува увозот од Северна Кореја


Пекинг, 14 август, 2017 - 16:59 (META) 

За три недели Кина ќе престане да увезува севернокорејски јаглен, риба и друга стока предвидена со санкциите кои Обединетите нации ги воведено кон Северна Кореја поради нејзината нуклеарна програма.

Царинската служба на Кина најави дека од 5 септември на полноќ ќе престанат процедурите што се однесуваат на увоз на стока од Северна Кореја.

„После тоа, увозот на стока ќе биде забранет“, стои во соопштението.

Одлуката на Кина доаѓа во екот на тензиите меѓу Вашингтон и Пјонгјанг, чии лидери изминатите денови разменија закани.

Северна Кореја предупреди дека би можела да испука ракети во насока на американскиот остров Гуам, додека претседателот на САД вети дека Пјонгјанг ќе се соочи со „оган и бес“.

Советот за безбедност на ОН на 5 август усвои резолуција која предвидува воведување нови поостри санкции кон Северна Кореја, откако оваа земја во јули ја лансираше втората интерконтинентална балистичка ракета.

Текстот на документот, кој го предложија САД е усвоен едногласно, а резолуцијата ја поддржа и Кина.

Сепак, кинеските лидери се противат на целосното запирање на трговијата со Северна Кореја, наведувајќи дека тоа би можело да распространување на гладот.


Северна Кореја е непосредна воена закана, смета министерот за одбрана на САД


Сингапур, 3 јуни, 2017 - 12:01 (META) 

Северна Кореја забрзано развива ракета со нуклеарна боева глава која може да претставува закана за Соединетите Американски Држави и за други земји, изјави денеска американскиот министер за одбрана, Џејмс Матис, говорејќи на меѓународна конференција во Сингапур.

Министерот за одбрана на САД ја нарекол Северна Кореја „непосредна воена закана“, јавуваат светските агенции. Матис истакнал дека администрацијата на американскиот претседател Доналд Трамп е охрабрена од тоа што Кина повторно покажала посветеност на соработката со САД и со другите земји што би влијаело на тоа Пјонгјанг да ја напушти програмата за нуклеарно оружје.

Советот за безбедност на Обединетите нации (ОН) вчера усвои резолуција со која се воведуваат санкции против четири институции и 14 севернокорејски функционери, вклучувајќи го и функционерот за кого се верува дека е на чело на разузнавачките служби на земјата.

Текстот на документот што го предложија САД е усвоен едногласно, а резолуцијата ја поддржа и Кина.


ОН ќе го санкционираат севернокорејското лансирање ракета


Њујорк, 16 мај, 2017 - 10:47 (META) 

Советот за безбедност на Обединетите нации го осуди најновото ракетно тестирање на Северна Кореја, истакнувајќи дека ќе преземе нови мерки, вклучително и санкции поради дестабилизирачкото однесување на Пјонгјанг.

Во соопштението, кое е едногласно усвоено, Советот за безбедност на ОН истакнува дека е многу важно Северна Кореја веднаш да покаже искрена посветеност на процесот на намалување на нуклеарното вооружување низ конкретни акции.

Генералниот секретар на ОН, Антонио Гутереш, ја осуди најновата ракетна проба на Северна Кореја и го повика Пјонгјанг да примени ограничување на нуклеарното вооружување.

– Со овој чин се прекршени резолуциите на Советот за безбедност и таа акција преставува закана по мирот и безбедноста во регионот – наведе Гутереш.

Северна Кореја потврди дека во неделата тестирала нов вид на ракета, наведувајќи дека станува збор за ракетата „хвасонг-12“ со среден до долг домет.

Вонредниот состанок на Советот за безбедност на ОН го свикаа САД и Јапонија.


Северна Кореја повторно лансираше балистички ракети


Пјонгјанг, 22 јуни, 2016 - 9:50 (META) 

Северна Кореја тестираше две балистички ракети од источното крајбрежје, пренесуваат светските медиуми.

Како што соопшти војската на Јужна Кореја, се верува дека станува збор за ракети со среден дострел.

Лансирањето на ракетите го забележала и американската војска, која соопшти дека нејзините сателити детектирале истрелување ракети, кои паднале во водите на Јапонското Море.


Успешно лансирана правата ракета од новиот руски космодром


Москва, 28 април, 2016 - 11:30 (META) 

Ракета „Сојуз 2“, која во орбитата околу Земјата однела три научни сателита, утрово успешно полета од новиот руски космодром Восточни.

Тоа е прво лансирање на ракета од овој космодром, изграден за Русија да ја намали својата зависност од Казахстан.

„Ракетата успешно полетала во предвиденото време, точно во 11.01 по локално време“, соопшти руската вселенска агенција Роскосмос и додаде дека сателитите веќе се во орбитата.

Руските телевизии емитуваа снимка од полетувањето на ракетата, а на лансирањето присуствуваше и рускиот претседател Владимир Путин.