Надлежните препорачуваат ограничени движења на отворено поради аерозагадувањето


Скопје, 4 декември, 2018 - 12:08 (META) 

На мерните станици Скопје – Бутел, Центар, Карпош и Ректорат, Кичево, Куманово, Миладиновци, Струмица, Битола 1, Тетово и Кавадарци е надмината вредноста на ПМ10 честичките од 100 микрограми на кубен метар во текот на два последователни дена, при што Министерството за животна средина ги извести Институтот за јавно здравје, Државниот инспекторат за животна средина, Град Скопје и единиците за локална самоуправа.

Од Министерството ги даваат следниве препораки:

  • Да се користи јавниот превоз
  • Возила да не се користат без поголема потреба
  • Повеќе лица да се возат со едно возило во исто време
  • Да не се користи за затоплување на простории прегорено отпадно масло, лакирани или обоени отпадоци од дрво и мебел, стиропор, ПЕТ амбалажа, парчиња гума и било каков синтетички материјал
  •  Правилно да се користат печките за дрва

Министерството за здравство и Институтот за јавно здравје препорачуваат ограничени движења и активности на отворен простор на најранливата популација (деца, стари лица, болни од хронични болести на белодробниот и срцевиот садовен систем, со посебен ризик за болните од бeлодробна астма), но и за лицата кои својот професионален ангажман го обавуваат на отворен простор во загадените зони на градот.


Народна банка и ЕЦБ склучија меморандум за соработка во сферата на супервизијата


Скопје, 4 декември, 2018 - 9:55 (META) 

Народната банка на Република Македонија (НБРМ) и Европската централна банка (ЕЦБ) склучија меморандум за соработка во сферата на супервизијата.

Од Народна банка велат дека соработката дефинирана со овој меморандум е од суштинско значење за натамошното унапредување на интегритетот, стабилноста и ефикасноста во работењето на банките.

„Согласно со неговите одредби, соработката меѓу двете институции ќе биде насочена кон обезбедување ефективна размена на супервизорски информации, имајќи ја предвид домашната и меѓународната регулатива, вклучително и Основните принципи за ефикасна банкарска супервизија донесени од Базелскиот комитет. Спроведувањето на неговите одредби ќе биде многу значајно и за остварувањето на определбата на НБРМ за постојано развивање на супервизијата во Република Македонија според најновите европски и меѓународни стандарди и препораки“, се вели во соопштението на НБРМ.

Во него се додава дека со иницирањето на овој многу значаен стратегиски документ, ЕЦБ ја вброи НБРМ меѓу централнобанкарските институции кои што ги смета за свои стратешки партнери во процесот на унапредување на супервизијата, а со тоа и во јакнењето на банкарските системи во Европа.


Венециската комисија со добра оценка, но и забелешки за судските закони


Скопје, 19 октомври, 2018 - 16:54 (META) 

Министерката за правда Рената Дескоска учествува на 116-та пленарна сесија на Европската комисија за демократија преку правото (Венециска комисија), на која е разгледано и усвоено Мислењето на Венециската комисија за Законот за изменување и дополнување на Законот за Судскиот совет и Законот за судовите, извести Министерството за правда.

„Според мислењето на Венециската комисија, кое е неодамна доставено до Министерството за правда, последните измени и дополнувања на Законот за Судски совет и Законот за судови се оценети позитивно, но се укажува и на потребата од понатамошно подобрување на текстовите на законите“, стои во соопштението за јавноста.

Во мислењето е истакнато дека двата закони поставуваат цврсти темели за добро функционирање на судството, но се препорачуваат и измени и дополнувања. Венециската комисија посочува во Законот за Судски совет да се наведе кој ја има функцијата на филтрирање во новиот систем за дисциплински постапки и да се допрецизира дисциплинската постапка и постапката за одговорност на судиите.

Дополнително, се бара и да се прецизира разликата направена помеѓу нестручно и несовесно вршење на судиската функција и она што претставува сериозен дисциплински престап.

Венециската комисија препорачува и укинувањето на основот за разрешување на судиите доколку се утврди повреда на Европската конвенција за човековите права, информираат од Министерството за правда.

Министерката Дескоска изразила подготвеност на Владата за спроведување на сите препораки на Венециската комисија за подобрување на законските текстови, но посочила дека за усвојување на ваквите измени ќе биде потребно двотретинско мнозинство во Собранието.


Ограничување на средствата од донации за партиите, предлагаат граѓанските здруженија


Скопје, 13 август, 2018 - 14:04 (META) 

Граѓанските здруженија реагираат во врска со неодамнешното донесување на измените и дополнувањата на Законот за финансирање на политички партии.

Од таму велат дека „усогласувањето на законските решенија било направено на нетранспарентен начин и иако се наведува дека законското решение црпи легитимитет од препораките на граѓанското општество дадени во документот „Блупринт – Предлог за итни демократски реформи“,  тие препораки се само селективно и делумно употребени во законот.“

„Сумарно овие законски решенија само ги зголемуваат финансиските средства за партиите кои ги обезбедуваат граѓаните, како и начините на кои партиите можат да обезбедат повеќе приходи. Тие не ги спречуваат злоупотребите, туку само индиректно ги намалуваат ризиците од злоупотреби, што може, но не мора, да ги реши проблемите. Со неукинување и неограничување на поединечните донации само се намалува прагот на донирање, но вкупниот износ никако не се ограничува. И во претходниот период, според финансиските извештаи на партиите, индивидуалните донации не биле повисоки од прагот кој сега се воведува. Партиите ќе може да изнајмуваат земјоделско земјиште, но истовремено, не е подобрена проверката на потеклото на донациите“, се додава во соопштението.

Од Институтот за демократија „Социетас цивилис“ Скопје, Центарот за економски анализи, Хелсиншкиот комитет за човекови права, Фондацијата Отворено општество – Македонија, „Еуротинк“, Здружението на новинари на Македонија, Институтот за европска политика Скопје, порачуваат ограничување на вкупниот износ на средства што може да се добијат од поединечни донации.

„Треба да се воведе подобрен механизам за задолжителна проверка на потеклото на средствата за секоја донација. Да се прецизира дека под земјиште како недвижен имот со кој располагаат партиите се однесува на она на кое се наоѓаат партиските објекти. Треба и задолжителна обврска на сите предлагачи на закон во сите фази вклучително и поднесување на амандмани“, се вели во препораките од здруженијата.


Возачите на камиони ќе се штитат од нелегалното уфрлување на мигранти


Скопје, 23 март, 2018 - 16:20 (META) 

Националниот координативен центар за гранично управување при Владата заедно со Стопанската комора на Македонија почнуваат координирана акција за сузбивање на нелегалното уфрлување на мигранти и бегалци во камионите на возачите од земјава кои учествуваат во меѓународниот сообраќај, од страна на трговците со луѓе, информираат од Стопанска комора на Македонија.

Целта е, како што велат, да се гарантира безбедноста на возачите, како и да се спречат несаканите последици врз функционирањето на возилата.

„Имено, сите учесници во меѓународниот сообраќај ќе добијат флаер на кој што јасно се објаснети и визуелно се претставени измамите кои ги прават трговците со луѓе злоупотребувајќи ги мигрантите и бегалците. На истиот се испишани и препораки како да делуваат возачите за да се заштитат од оваа нелегална појава. На граничните премини, исто така ќе бидат поставени и постери со идентична содржина“, информираат од Стопанска комора на Македонија.


Девет заразени со морбили во Македонија, се препорачува вакцинирање


Скопје, 15 март, 2018 - 16:18 (META) 

Комисијата за заразни болести при Министерството за здравство денеска одржа редовна работна средба, со цел, согледување на состојбата со морбили во соседството и во европскиот регион, како и состојбата со морбили во државата.

Од таму информираат дека, во Македонија оваа година досега се регистрирани девет случаи со морбили, од кои само четири се епидемиолошки поврзани.

„Службите за имунизација при Здравствените домови да ги интензивираат активностите за проверка на евиденцијата и изнаоѓање невакцинирани или непотполно вакцинирани деца, со цел нивна вакцинација. Здравствените работници да обратат посебно внимание на исипните трески кај пациентите и доколку се посомневаат за морбили, веднаш да пријават до надлежните служби“, се дел од заклучоците на Комисијата.

Се препорачува, лицата кои патуваат во земји каде има активни епидемии на мали сипаници да го проверат својот вакцинален статус и доколку не се вакцинирани, некомплетно вакцинирани или немаат доказ за прележана болест, соодветно ќе се вакцинираат.

„Препорака до родителите е навремено да ги вакцинираат своите деца, пред се поради заштита на нивното здравје, како и заштита на здравјето на најблиските и на пошироката заедница“, се додава во соопштението.


Одрон на патот Тетово – Попова Шапка, сообраќајот се одвива по една лента


Скопје, 14 февруари, 2018 - 19:52 (META) 

Сообраќајот на патниот правец Тетово – Попова Шапка се одвива по една лента поради одрон на патот, информираат од Автомото-сојузот на Македонија.

Сообраќајот на државните патишта се одвива по влажни коловози, а нa повисоките места има остатоци од кашeст снег.

Во клисурите и засеците можна е појава на одрони, особено на патните правци Кочани –  Македонска Каменица – Делчево, Виница – Берово, Гостивар – Стража, Маврово – Дебар – Струга, Демир Капија – Удово, Катланово – Велес, Крушево – Демир Хисар и Ресен – Буково.


ЦЕА: Пратениците и обвинителите треба повеќе да ги користат ревизорските извештаи


Скопје, 5 февруари, 2018 - 16:53 (META) 

Пратениците, во нивната работа во Собранието, повеќе да ги користат извештаите на ревизорите, се вели во извештајот од следењето на работата на Државниот завод за ревизија, спроведен во рамките на проектот „Подобрување на финансиската отчетност и транспарентност во Македонија“.

Ревизорските извештаи недоволно се користат и од страна на обвинителите, кои не отвораат предистражни постапки врз база на наодите на ревизорите. Засега, не постои законска можност ревизорите да покренуваат судски постапки.

Неодамна и од Владата информираа дека институциите не постапуваат по однос на препораките на ревизорите, и тоа во следниот период ќе се менува. Ќе се формира ревизорски комитет во Владата, кој ќе ги прегледува извештаите и ќе дава соодветни препораки во однос на работата на државните институции.

„Забелешките не се однесуваат само на финансиското работење туку и на многу правни недостатоци, внатрешна погрешна организациска поставеност, отсуство на вработени во дадени сектори и слично“, информираше генералниот секретар на ДЗР, Александар Поповски.

Лани, ДЗР поднел ревизорски извештај до Основно јавно обвинителство за единицата на локална самоуправа Прилеп, Клиниката за пулмологија и алергологија и Клиника за трауматологија, ортопедски болести, анестезија, реанимација, интензивно лекување и ургентен центар.

ДЗР поднел ревизорски извештаи до Комисијата за спречување на корупција за Универзитет за информатички науки и технологија „Св.Апостол Павле“ од Охрид и Клиниката за пулмологија и алергологија.

Со програмата за работа за оаа година, се предвидува да бидат спроведени 67 ревизии, што е за девет повеќе од лани.

„До донесувањето на програмата за работа биле поднесени вкупно 70 барања од различни субјекти за вршење на ревизија, што значи дека граѓаните се поттикнале да поднесуваат барања, доколку се сомневаат за нерегуларноста на работа на некои институции. Од вкупно доставените, 22 биле прифатени. Колку за споредба, во 2015 и 2016 година во ДРЗ биле пристигнати вкупно 22 барања од кои 16 биле прифатени“, информираше Габриела Димовска од Центарот за економски анализи (ЦЕА).

Инаку, во процедура е избор на нов главен државен ревизор по истекувањето на деветгодишниот мандатот на претходниот ревизор Тања Таневска.


Утринава стапија на сила мерките на владата за заштита од загадувањето


Скопје, 27 декември, 2017 - 11:36 (META) 

Поради измерена висока концентрација на штетни честички во воздухот од над 200 микрограми на еден метар кубен на две места, од денеска стапуваат на сила мерките на владата за заштита од загадувањето, соопшти портпаролот на владата Миле Бошњаковски на денешната прес-конференција.

Бошњаковски соопшти дека мерките се стапени на сила од 9.30 утринава.

Тие меѓу другото предвидуваат бремените жени, лица со хронични заболувања и лица постари од 60 години да не одат на работа. Тие предвидуваат и намалување на цените или бесплатен градски превоз, зголемување на контролите на градилиштата, работа на градилиштата од 11-17 часот, како и контрола на МВР на движењето на товарните возила, односно да ја користат обиколницата.

Според Бошњаковски Град Скопје денеска ќе решава за оваа мерка и ќе излезе со информација во јавноста.

Прашан за автобускиот превоз Бошњаковски рече дека одлуката за намалување на цената на билетите или бесплатен превоз треба да ја донесат градските власти.


ТИ: Не се преземаат доволно активности за борба против корупцијата


Скопје, 22 декември, 2017 - 12:06 (META) 

Македонија и понатаму не презема доволни напори за исполнување на препораките на Групата на држави против корупција на Советот на Европа (ГРЕКО), информираат од „Транспаренси интернешнл“ Македонија.

Во соопштението се додава дека, државата се уште не постапила адекватно за да отстрани низа забелешки дадени во извештајот на ГРЕКО, донесен пред четири години.

„Ова го потврдува и неодамна дадената изјава на претседателот на ГРЕКО, Марин Мрчела кој истакна дека ГРЕКО очекува препораките да се исполнат не поради самата група на држави за борба против корупцијата, туку поради граѓаните. Од 19 препораки во извештајот, три се исполнети, десет се делумно исполнети, а шест не се воопшто исполнети“, се додава во соопштението.

Од „Транспаренси интернешнл“ велат дека, државата не презема доволно активности за борба против корупцијата согласно овие препораки, за што информирале и на почетокот на годината.

„Четири од препораките за кои недостасува имплементација се однесуваат на спречувањето на корупција кај членовите на Собранието, а другите две неспроведени препораки се однесуваат на судството и јавното обвинителство. Денес, речиси една година подоцна,  работите не се поместени од точката на која што биле и тогаш“, се додава во соопштението.

„Транспаренси интернешнл“ ја повикува Владата сериозно да се зафати со исполнувањето на овие препораки, така што ќе формира посебен тим кој ќе го следи спроведувањето на овие препораки.