!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

Прифатено обвинението за „Титаник 2“, на обвинителна клупа Мијалков и Тачи


Скопје, 7 декември, 2017 - 10:04 (META) 

Советот за оценка за обвинителен акт при Основниот суд Скопје 1 го прифатил обвинението на СЈО за предметот „Титаник 2“, во врска со изборни нерегуларности.

Во случајот обвинети се поранешниот шеф на УБК, Сашо Мијалков, лидерот на ДПА, Мендух Тачи, членот на ДИК од ВМРО-ДПМНЕ, Сашо Срцев, како и поранешните членови на ДИК, Бедредин Ибраими и Анета Стефановска и Влатко Сајковски.

Советот не го прифатил предлогот за злоупотреба на службената положба да одговараат и петте судии од Управниот суд. Претходно судскиот совет им го одзеде имунитетот на управните судии Билјана Никодиновска-Петровска, Лидија Ивановска, Благородна Рангелова, Анета Џигерова и Газмент Фејзула, кој ги штитеше од кривична одговорност.

Предметот „Титаник 2“ се однесува на местење резултати на локалните избори во 2013 година. Според „бомбите“ што ги објави опозицијата, Мијалков и Тачи се договарале за гласање во однос на поднесени приговори до ДИК.

Апелацискиот суд одлучи прислушуваните разговори да бидат употребени како докази во постапката.


Ѓорчев: Ова беа најнерегуларни и најнедемократски избори во историјата


Скопје, 30 октомври, 2017 - 17:03 (META) 

Република Македонија во текот на вчерашниот ден ги имаше најнерегуларните и најнедемократските избори во историјата на независна Македонија, изјави денеска во седиштето на ВМРО-ДПМНЕ, Влатко Ѓорчев, член на извршниот комитет на партијата.

– Никогаш последниве 27 години немало понасилни избори и немало избори со повеќе поткуп, насилство и нерегуларности. ВМРО-ДПМНЕ до меѓународните претставници, до ОБСЕ и ОДИХР достави видео и фотоматеријали за голем број од забележаните изборни нерегуларности. Станува збор за изборен криминал. Во текот на целиот вчерашен ден беше вршен систематски психолошки притисок врз граѓаните за да им се втера страв и да не излезат на гласање. Забележан е и спречен обид за бугарски воз во Чаир, а информации за извршен бугарски воз имаме од повеќе места. Демократијата и правната држава вчера беа погребани во Република Македонија. СДС покажа дека нема намера да спроведува фер и демократски избори и дека сака целосна контрола врз институциите за целосен притисок врз граѓаните – рече Ѓорчев.

Тој ги повтори барањата што синоќа ги соопшти лидерот на ВМРО-ДПМНЕ, Никола Груевски, кои, како што рече, се „неопходен услов за враќање на демократијата и на владеењето на правата во државата“.

Меѓу барањата се техничка влада да организира предвремени избори, смена на директорот на ААВМУ, оставка на претседателот на ДИК, истрага за прислушување на 100 лица од редовите на ВМРО-ДПМНЕ, завршување на судењето на „Поткуп“, основање на специјално обвинителство за расчистување на изборните нерегуларности во 2016 и во 2017 година, како и ослободување на лицата кои се во притвор за насилството во Собрание на 27 април.


Спасовски: Двајца приведени за поткуп на гласачи, петмина за фотографирање ливчиња


Скопје, 29 октомври, 2017 - 21:33 (META) 

Министерот за внатрешни работи, Оливер Спасовски, на прес-конференцијата еден час по затворањето на гласачките места објави дека има седуммина приведени за изборни нерегуларности, како и едно лице приведено за физичко насилство, за кое уште се истражува дали е поврзано со изборите.

– По долго време Македонија е горда што имаше фер, демократски и мирни избори – рече Спасовски, нагласувајќи дека МВР, постапувајќи согласно своите законски надлежности, презело мерки и активности со кои им обезбедило на граѓаните слободно да ја изразат својата волја и да го остварат правото на глас.

Тој посочи дека според oперативниот штаб на министерството, изборниот ден поминал мирно и им честиташе на „припадниците на македонската полиција за покажаната професионалност и за успешното и ефикасно извршување на зададените работните задачи“.

Спасовски потоа нагласи на кои места се случила нерегуларностите поради кои се приведени седумте лица.

– Во полициската станица Бит-пазар приведени се две лица поради сомнеж дека извршиле поткуп на избори и гласање, а во врска со пријава дека на улица Максут Садик во Скопје се врши поткуп на гласачи.  Исто така, приведени се и пет лица кои ги фотографирале избирачките ливчиња од гласањето, од нив три се во Скопје, а по едно во Пробиштип и во село Дулица.  Во Скопје се фотографирале гласачки ливчиња на гласачкото место во ОУ „26 Јули“, на гласачкото место во месната заедница Црниче и на гласачкото место во ОУ „Васил Главинов“. Против овие лица, ќе бидат поднесени соодветни прекршочни пријави. Како што претходно информиравме, пријавен е и физички напад во општината Шуто Оризари, приведено е едно лице и во моментот се работи на целосно расчистување на случајот – рече Спасовски


Едмонд Темелко доби уште 30 дена притвор


Скопје, 27 октомври, 2017 - 17:34 (META) 

Основниот Суд Скопје 1 го продолжи притворот за уште 30 дена на градоначалникот на Пустец, Едмонд Темелко, кој беше уапсен кон крајот на минатиот месец.

Темелко, обвинет за изборни малверзации во случајот „Титаник“ на СЈО, и понатаму  ќе остане во Истражниот затвор „Скопје“.

Тој е во притвор од 26 септември, а во „Титаник“, освен него, обвинети се и Никола Груевски, Гордана Јанкулоска и Миле Јанакиески.


Полицијата расчистува два случаи на притисок поврзани со локалните избори


Штип, 24 октомври, 2017 - 15:42 (META) 

Министерството за внатрешни работи работи на два случаи со притисоци во врска со локалните избори.

Првиот случај е во Центар Жупа, каде претседателот и четири членови на општинската изборна комисија на Општина Центар Жупа пријавиле неовластено снимање. Имено, на фејсбук-профилот на Р.И. биле објавени фотографии од денот на примањето на изборниот материјал на општинската изборна комисија во Центар Жупа од избирачките одбори, како и текст со кој, според пријавата, се нарушувал угледот на општинската изборна комисија.

Полицијата од Дебар почнала постапка.

Вториот случај бил пријавен вчера во полициската станица во Штип. Штипјанка кажала дека претходниот ден по телефон ѝ се јавил Ј.С. од Штип и ѝ кажал дека таа и нејзиното семејство на вториот круг од локалните избори в недела треба да гласаат за кандидатот за градоначалник на Штип од неговата политичка партија. За овој случај бил известен и јавен обвинител.


Груевски: Гласачите нè казнија бидејќи се оддалечивме од традиционалните политики


Скопје, 21 октомври, 2017 - 23:14 (META) 

ВМРО-ДПМНЕ беше казнета од своите гласачи бидејќи во изминатиот период партијата се оддалечи од традиционалните политики и се обиде да им се допадне на „некои други“, рече лидерот на опозициската партија, Никола Груевски, во вечерашното интервју на телевизијата „Алфа“.

– ВМРО-ДПМНЕ беше казнета од традиционалните гласачи кои испратија порака до раководството. Имавме традиционална политика во изминатите 15 години, а овој период се обидовме да им се допаднеме на некои други, што не им се допадна на традиционалните гласачи. Ние тоа го направивме нагло и недоволно вешто – рече Груевски.

Претседателот на ВМРО-ДПМНЕ, за тешкиот пораз на партијата во првиот круг на локалните избори, ја обвини власта за „поткуп, уцени и заплашување“ на членството на партијата и на кандидатите за градоначалници.

Во интерјвуто Груевски рече дека изборите биле „нелигитимни и недемократски“. Тој  го обвини СДСМ дека вложил „20 милиони евра црни пари“ за поткуп, а цената за гласачите изнесувала од 1.500 денари до 100 евра.

Во однос на изборните нерегуларности, Груевски рече дека печатницата која била избрана да го печати изборниот материјал била во сопственост на активист на СДСМ и дека то била истата печатница што го печатела материјалот на Шарената револуција.

– Имавме недостиг од материјал, а ДИК не реагираше. Беа испечатени паралелни гласачки ливчиња за потребите на ДИК и на СДСМ. Мнозинството членови на ДИК се наклонети на СДСМ. ОБСЕ/ОДИХР ги викавме двапати за нерегуларностите и од нивно лице се гледаше дека не се дојдени да слушнат и да спречат –  изјави Груевски.

Прашан за идните активности на партијата и за неговата оставка, рече дека партијата ќе се фокусира на вториот круг од локалните избори и по завршување на изборите ќе се прави длабински анализи и ќе се донесе одлука која е најдобра за партијата и за државата.

– Ако сакаат да се пресметуваат со ВМРО-ДПМНЕ и со мене, тука сум. Нека ме уапсат и нека ме осудат на доживотен затвор. На што личи ова што се случува во државата? Нема да го скршат духот на Македонецот без разлика дали Груевски ќе биде лидер или не – рече Груевски.

Тој истакна дека според информациите што ги има, целото раководство на ВМРО-ДПМНЕ, односно повеќе од 100 луѓе биле прислушувани во изминатиот период.

– Во УБК е отворено досие под името „Македонски екстремизам и тероризам“. Такви досиеја се воделе во комунизмот и во 1990-тите против ВМРО-ДПМНЕ, како случаите „Темел“ и „Сина птица“. Така и сега, против ВМРО-ДПМНЕ се водат истраги за да се урниса партијата – рече Груевски.


СДСМ: Помина времето кога граѓани „за уши, еден по еден“ се носеле на гласање


Скопје, 20 октомври, 2017 - 16:48 (META) 

Социјалдемократскиот сојуз на Македонија (СДСМ), се огласи со реакција на обвинувањата што денеска на прес-конференција ги изрече Спиро Ристовски, претседател на републичкиот изборен штаб на ВМРО-ДПМНЕ, кој обвини за огромни нерегуларности и „бугарски возови“ во првиот круг од локалните избори, кој се одржа во неделата, 15 октомври. Владејачката партија на ВМРО-ДПМНЕ ѝ порачува дека завршило времето кога снемувало ливчиња, се правеле „бугарски возови“, а граѓаните „за уши еден по еден“ се ваделе да гласаат за ВМРО-ДПМНЕ.

„Институциите обезбедија слободни избори, ВМРО-ДПМНЕ да го признае поразот на фер и демократски избори. ВМРО-ДПМНЕ не може да се помири со фактот што Македонија конечно после долг период имаше фер, демократски и слободни избори на кои граѓаните гласаа слободно и без притисоци, што беше потврдено и од извештаите на релевантните институции. Резултатите јасно покажаа каква е вистинската избирачка волја кога граѓаните гласаат слободно и без притисоци. Изборниот поткуп, злоупотребата на државните институции и ресурси, заканите и списоците за притисоци на граѓаните беа одлика на децениското владеење на Никола Груевски и ВМРО-ДПМНЕ“, се вели во реакцијата од СДСМ.


СДСМ: ВМРО-ДПМНЕ да се одважи да го признае поразот на изборите


Скопје, 17 октомври, 2017 - 14:58 (META) 

Одговарајќи на денешното соопштение на ВМРО-ДПМНЕ, Социјалдемократскиот сојуз порача дека изборите биле регуларни и слободни, првпат по долг период, а избирачката волја на граѓаните била почитувана. ВМРО-ДПМНЕ денеска ги повтори своите обвинувања од неделата дека имало бројни нерегуларности и посочи на нови инциденти.

„Во Република Македонија по долг период, првпат имаше фер, регуларни и слободни избори на кои граѓаните гласаа по сопствено убедување и без притисоци. Резултатите покажаа како изгледа Македонија кога граѓаните гласаат слободно и кога целосно се почитува нивната избирачка волја“, вели СДСМ.

Владејачката партија порача дека ВМРО-ДПМНЕ треба да се одважи и да им честита на граѓаните за мирните и фер избори и да го признае изборниот пораз.


ВМРО-ДПМНЕ без реакција на извештајот на ОБСЕ/ОДИХР


Скопје, 17 октомври, 2017 - 12:11 (META) 

ВМРО-ДПМНЕ ја кажа својата оценка за изборниот процес, а дали и колку се совпаѓа таа со извештајот на ОБСЕ/ОДИХР за изборите, не знам…, одговори Иво Котевски, портпаролот на ВМРО-ДПМНЕ, на прашање од „Мета“ дали партијата ќе има реакција на вчерашната оценка за телото на ОБСЕ што ги следи изборните процеси. Инаку, ОБСЕ/ОДИХР зборуваше за напредок во спроведувањето на изборите.

– Иако процесот сè уште не е завршен, на овие избори се виде напредок во демократскиот процес на оваа земја и довербата на гласачот во изборниот процес се зголемува. Се надеваме дека ова ќе продолжи и во вториот круг – изјави вчера амбасадорката Одри Гловер, шеф на мисијата за набљудување на изборите на ОБСЕ/ОДИХР.

Го прашавме Котевски дали највисоките партиски тела, односно извршниот и централниот комитет на ВМРО-ДПМНЕ ќе заседаваат наскоро, бидејќи партискиот лидер Никола Груевски неколку часа по завршувањето на првиот круг гласање обвини за недемократска атмосфера, нефер услови и за злоупотреби, а најави дека за изборниот пораз ќе се расправа наскоро во рамките на ВМРО-ДПМНЕ. Котевски појасни дека медиумите ќе бидат информирани кога ќе има седници на телата.

Инаку, во првото соопштение што ВМРО-ДПМНЕ го испрати до медиумите во последните 36 часа, се вели дека насилствата продолжуваат и по изборите, реагирајќи за нападот врз претседателот на ГРОМ, Стевчо Јакимовски, и за уште два инцидента.


Спасовски: Мирен изборен ден, 46 пријави за изборни нерегуларности


Скопје, 15 октомври, 2017 - 20:34 (META) 

Не се регистрирани посериозни нарушување на изборниот процес, а до МВР се доставени 46 пријави за помали нерегуларности, како фотографирање гласачко ливче, гласање за друг, поткуп и носење гласачи на избори, информираше денеска на прес-конференција министерот за внатрешни работи, Оливер Спасовски.

МВР евидентирало 44 прекини на гласање на гласачки места, каде по 15 до 20 минути прекин, гласањето продолжило.

Спасовски информираше дека се приведени 10 лица за неовластено фотографирање.

– За поткуп во Битола приведени се три лица, а две лица, едно во скопско Мирковци и едно во Кавадарци, се приведени за гласање во име на друго лице. Расчистени се инцидентите во село Горно Седларце и во Бутел. До МВР пристигнаа шест пријави дека полициски службеници се однесувале непрофесионално, од нив три пријави се неосновани, во еден случај имало основа за пријавата, а на друг случај сè уште се работи – изјави Спасовски.

Според министерот, во текот на кампањата, а особено денеска за време на гласањето, МВР било целосно во служба на граѓаните за да обезбеди услови денот да помине мирно и граѓаните без притисок да си го остварат своето демократско право.