Муижниекс: Општеството е длабоко поделено по етнички и јазични основи


Скопје, 2 февруари, 2018 - 12:57 (META) 

Македонското општество останува длабоко поделено по етнички и јазични основи. Kрајно време е политичките лидери да осмислат стратегија за интеграција, за да ги надминат овие поделби. Ова е еден од заклучоците на комесарот за човекови права, Нилс Муижниекс, по петдневната посета на државата.

Тој им порача на македонските власти „да спроведат политики што поттикнуваат интеграција и разбирање помеѓу етничките заедници и промовираат социјална кохезија, истовремено штитејќи ја разновидноста.“

Муижниекс во извештајот оценил дека „мировниот договор што стави крај на меѓуетничкиот конфликт во 2001 довел до промени, како во областите на правичната застапеност на заедниците во јавните институции, децентрализацијата и употребата на јазиците, но социјална кохезија не била постигната.“

Комесарот бил особено загрижен заради растечката поделба помеѓу етничките македонски и етничките албански деца, кои, како што оценил „имаат малку можности да се среќаваат, да учат и да си играат заедно, бидејќи образовниот систем е поделен според наставниот јазик.“

„Сепарацијата раѓа недоверба, стереотипи и предрасуди. Децата се иднината и од клучна важност, во мултиетничко општество, е да им се даде можност и вештини да градат меѓусебно разбирање, почитување и толеранција. Наместо да ги држи разделени, образовниот систем треба да им обезбеди опкружување што овозможува и поттикнува интеракција“, оценува Муижниекс.

Тој апелираше до властите да разработат посистематски и долгорочни политики за да ја одбегнат сепарацијата помеѓу децата од различните етнички заедници во образовниот систем. Муижниекс апелираше да се промовираат можностите за учење на македонскиот јазик уште од рана возраст за сите деца, а албанскиот и другите немнозински јазици, во областите каде ваквите заедници живеат во значителен број.

Комесарот за човекови права, Муижниекс истовреме ја поздравил подобрената атмосфера во земјата за унапредување на човековите права и им порача на лидерите да го искористат овој момент за да постигнат вистинска промена, за сите припадници на македонското општество да можат да ги уживаат своите човекови права.

За време на петдневната посета тој имаше средби со претседателот, премиерот и министрите за правда, надворешни работи, труд и социјална политика, образование, министерот надлежен за спроведување на Стратегијата за Ромите, членови на Собранието, претставници на локални власти и невладини организации.


УНИЦЕФ: Во Јемен страдале или биле повредени 5.000 деца


Сана, 16 јануари, 2018 - 20:38 (META) 

УНИЦЕФ соопшти дека како последица од војната во Јемен страдале или биле повредени околу 5.000 деца додека 1,8 милиони се прегладнети.

Во извештајот на УНИЦЕФ наведено е дека речиси два милиони деца не одат во училиште од почекот на конфликтот во Јемен кој изби во март 2015 година.

Речиси половина млади во таа земја немаат пристап до чиста вода за пиење додека на 400.000 од нив им е потребна итна помош.

Покрај конфликтот и гладот, Јемен го погодила и епидемија на колера од која се заболеле повеќе од милион луѓе, додека една четвртина инфицирани се деца под пет години.

Во граѓанската војна во Јемен од март 2015 година, загинаа околу 9.000 лица, неколку десетина илјади се ранети, а повеќе од 2,5 милиони се во бегство.


МОН ќе испитува дали има верско организирање и дејствување во училиштата


Скопје, 8 јануари, 2018 - 13:02 (META) 

Начелото на секуларност треба да се почитува во училиштата, а за расчистување на какво било сомневање околу прекршување на законските одреди од областа на образованието, Министерството за образование и наука утре ќе побара од Државниот просветен инспекторат да ги испита сите индиции за евентуално верско организирање и дејствување во училиштата, велат од МОН по реакциите во јавноста за учеството на децата во Бадниковите поворки.

Од Министерството за образование и наука велат дека од нив не била побарана, ниту пак Министерството дало согласност за преземање на било какви активности во училиштата за подготовка или организирање на учениците за учество во овие манифестации.

„Во оваа прилика укажуваме дека на граѓаните на Република Македонија им се гарантира правото на здружување и слободата на вероисповеста, односно слободно и јавно, поединечно или во заедница со други, изразување на верата, но во Законот за основното образование во членот 11 е наведено дека „во основното училиште се забранува политичко и верско организирање и дејствување“. Воедно, наставниците во спроведувањето на наставата по сите задолжителни или изборни предмети, се должни да ја следат програмата која е утврдена од страна на Министерството“, се вели во соопштението од МОН.


Шилегов: Децата во бадниковите поворки не беа злоупотребени за религиски цели


Скопје, 7 јануари, 2018 - 13:09 (META) 

Градоначалникот на Град Скопје, Петре Шилегов смета дека децата кои учествуваа во бадниковите поворки вчера, не биле злоупотребени за религиски и за политички цели.

Според него, градоначалниците на општините и Град Скопје излегле во пресрет на барање на граѓаните, за обезбедување на автобуски превоз за децата.

„Иницијативата потекнува од самите родители, кои свесно децата ги внеле во таа иницијатива. Ние како Град Скопје само излеговме во пресрет на потребите за превоз на децата со автобуси“, одговори Шилегов на новинарско прашање, по присуството на божикната литургија во Соборниот храм „Св. Климент Охридски“ во Скопје.   

Вчера, одредени здруженија и граѓански иницијативи реагираа на учеството на децата во бадниковите поворки кои се одржаа во повеќе градови во државата, како дел од прославата на Бадник и на Божиќ.


Активистите ги повикуваат родителите на бојкот на наставата, поради загадениот воздух


Скопје, 14 декември, 2017 - 10:36 (META) 

Активистите за чист воздух и здрава животна средина, ги повикуваат родителите да ја бојкотираат наставата во училиштата на 20 декември (среда), поради енормно загадениот возух.

На Фејсбук-страницата „Бојкотирам настава“ тие велат дека, ниту еден протест до сега, не помогнал во решавање на проблемот со загаденоста, па затоа и се менува начинот на искажување на револт.

„Мерните станици низ Скопје веќе две недели покажуваат оргомна загаденост на воздухот. За важноста на справување со загадувањето, како најголем и најопасен проблем, ги потсетуваме одговорните веќе четири години. Досега се обидовме со чести собири за искажување на назадоволството од непсравувањето со ниедна точка од овој комплексен проблем, за да ги потестиме службениците да си ја сработат работата за која се нафатиле да ја сработат, а за што добиваат плата од наши пари. Бидејќи досегашните форми на протест не вродија со никаков плод, отсега го менуваме начинот на искажување револт“, се вели во апелот.

Утринава скопјани се разбудија во густа магла, намалена видливост и големо загадување на амбиенталниот воздух. Мерните станици на Министерството за животна средина, во скопското подрачје покажуваат енормно загадување на воздухот. Многу високо ниво на канцерогените ПМ10-честички и ПМ2,5-честички има во Центар, Карпош, Лисиче, Гази Баба и Ректорат.


Царовска: Во буџетот предвидени се повеќе пари за градинките и минималната плата


Скопје, 12 декември, 2017 - 14:30 (META) 

Предлог-буџетот на Министерство за труд и социјална политика e околу 700 милиони евра и е со највисок износ од сите владини ресори, а најголемиот дел од средствата одат директно кај граѓаните, рече денеска на прес-конференција, министерката за труд и социјална политика, Мила Царовска.

На презентацијата на предлог-буџетот, таа додаде дека повеќе пари се наменети за детски градинки и минимална плата, а укинати се нерационалните трошоци. МТСП ќе се фокусира на подобрување на опфатот на деца во детските градинки и подобрување на просторните и кадровски капацитети.

– Буџетот е дизајниран за поддршка на социјално загрозените категории, за инклузија и за помош на ранливите групи на граѓани. Имено, над 120 илјади граѓани се корисници на социјални надоместоци во износ од 8 милијарди денари. Тоа се средства наменети за правата од социјална заштита, детска заштита, цивилни инвалиди, борци и воени инвалиди итн – рече Царовска.

МТСП за активните мерки за вработување, предвидува околу 16 милиони евра, а за финансиска поддршка на фирмите, за исплата на минимална плата, планирани се 7.500.000 евра.

Министерката Царовска нагласи дека, во буџетот за идната година се намалени нерационалните трошоци за репрезентација во министерството и намалени се или укинати надоместоците за учество во комисии и работни групи, кои во изминатите години биле неоправдано високи.


Две жени и четири деца каснати од куче во Општина Аеродром


Скопје, 8 декември, 2017 - 12:50 (META) 

Во изминатите два дена, во полициската станица Аеродром пријавени се шест настани во врска со напад на куче скитник врз граѓани на подрачјето на населбата Аеродром, помеѓу булеварите Јане Сандански и АСНОМ, се вели во билтенот на МВР.

Се работи за шест лица, од кои две жени на возраст од 40 и 44 години и четири деца на возраст од 10 до 14 години, кои се каснати од куче.

Од страна на полициската станица Аеродром била известена шинтерската служба на Град Скопје.


СЗО: 11 отсто од лековите во земјите во развој се фалсификувани


Копенхаген, 29 ноември, 2017 - 10:01 (META) 

Светската здравствена организација соопшти дека околу 11 отсто од лековите во земјите во развој се фалсификувани.

Како што наведуваат од СЗО, таквите лекови веројатно се причина за смрт на десетина илјади деца од болести како што се маларија и воспаление на белите дробови.

Ова е прв обид СЗО да направи проценка и да го разгледа овој проблем, јавуваат светските агенции.

Експертите разгледале 100 студии за повеќе од 48.000 лекови. Речиси 65 отсто од фалсификуваните лекови се медикаменти за лечење маларија и бактериски инфекции.

Научниците кои ги ангажирала СЗО од Универзитетот во Единбург проценуваат дека меѓу 72.000 и 169.000 деца починале од воспаление на белите дробови затоа што примале лажни лекови.


Шест лица повредени во сообраќајка на патот Маврови Анови – Дебар


Гостивар, 8 ноември, 2017 - 20:47 (META) 

Шест лица се повредени, од кои четири деца, во сообраќајна несреќа што денеска попладне се случила на патот Маврови Анови – Дебар.

Според информациите на СВР Тетово, сообраќајната несреќа се случила околу 16 часот, кога возило „мерцедес“ со тетовски регистарски ознаки, што го управувал 46-годишниот Ј.Џ. од Голема Речица се судрило со товарно возило „ман“, што го управувал 43-годишниот М.Б. од селото Челопек.

Во несреќата, покрај возачот на мерцедесот повредени се неговата сопруга Е.Џ. (36) и четири малолетни деца кои биле во автомобилот. Повредените деца, од кои едно потешко, се префрлени на скопските клиники.


Пуштен во употреба реновираниот оддел за интензивна нега на Клиника за детски болести


Скопје, 13 октомври, 2017 - 12:42 (META) 

Денеска е пуштен во употреба реновираниот оддел за интензивна нега и терапија на Клиниката за детски болести.

„Одделот за интензивна нега ќе работи со истиот капацитет како и досега, со можност да се зголеми со нови вработувања на медицински персонал, со што ќе се испочитуваат високите стандарди на згрижување на најтешко болните деца и ќе се гарантира безбедноста на пациентите“, се вели во соопштението на Министерството за здравство.