МЦМС: 86,3 проценти од граѓаните сметаат дека е важно родителите да ги вакцинираат децата


Скопје, 18 февруари, 2019 - 12:15 (META) 

Актуелната состојба со епидемијата на морбили беше причина МЦМС да го провери јавното мислење за вакцинирањето. Според истражувањето, за големо мнозинство од граѓаните (89,7 проценти) целосно или донекаде се важни вообичаените вакцини кои се применуваат во земјава. Висок е и процентот (86,3 проценти) на оние кои сметаат дека целосно или донекаде е важно родителите да ги вакцинираат децата. Околу 69 проценти од граѓаните се загрижени дека може да избие епидемија не само на сипаници туку и на други заразни болести.

Речиси две третини, 59,2 проценти од испитаните граѓани целосно или делумно се согласуваат со привремената мерка на Министерството за здравство, за забрана на прием на деца што немаат примено  МРП вакцина во градинките.

„Големо мнозинство од граѓаните (69,7 проценти) целосно или донекаде се загрижени за несаканите дејства од вакцините,  но 86,6 проценти рекле дека немаат искуство со некој што имал несакана реакција на вакцина. Такво искуство имале осум проценти од испитаниците. Прашани за тоа дали веруваат дека постои поврзаност помеѓу вакцините и аутизмот, 9,8 проценти целосно се согласуваат, а 16,7 проценти воопшто не се согласуваат. Мнозинство од граѓаните (54,1 проценти) сметаат дека безбедноста на детското вакцинирање бара понатамошна дебата иако 38,2 проценти сметаат дека науката која ја поддржува безбедноста на детското вакцинирање е неоспорна“, се вели во истражувањето.

Од друга страна, вкупно 56,9 проценти имаат целосна или делумна доверба во системот на државата за оценка на безбедноста на вакцините и препораките кои треба да бидат дадени. Речиси половина од граѓаните (47,2 проценти) веруваат дека имале придобивки од развојот на вакцините.

„Вкупно 71,9 проценти од испитаниците целосно или донекаде се согласуваат дека доколку некое дете не е вакцинирано, други деца се изложуваат на ризик од болест. Повеќе од половината од граѓаните (54,6 проценти) сметаат дека со одлуката на родителите да не ги вакцинираат децата, тие ги изложуваат на ризик и децата и целото општество, додека една третина (33,1 проценти) сметаат дека родителите треба да имаат право да одлучат дали нивните деца ќе се вакцинираат или не. Многу сличен е и процентот (33,6 проценти) на оние за кои вакцинирањето е прашање на личен избор, за разлика од мнозинството (61,5 проценти) за кои вакцинирањето е прашање на јавното здравство“, се додава во истражувањето.

На прашањето. дали разногласието во врска со вакцинирањето се должи на (не)информираноста, вкупно 51,6 проценти рекле дека јавноста не добива доволно информации од докторите за вакцинацијата.

За МЦМС, анкетата ја спроведе „М-Проспект“. Податоците за последната анкета беа прибирани со теренска анкета во периодот од 15 до 30 јануари 2019 година. Анкетата е спроведена на национален репрезентативен примерок од 1001 испитаник.


МТСП: Поголеми плати за кадарот во градинките со Законот за детска заштита


Скопје, 25 јануари, 2019 - 13:36 (META) 

Покачувањето на платите на вработените во градинките продолжува и во 2019 година, информираат од Министерство за труд и социјална политика (МТСП).

Од таму додаваат дека со измените на Законот за детска заштита кои што се во собраниска процедура и треба да се најдат на гласање пред пратениците е предвидено покачување на платите на кадарот во градинките.

„Со истите измени за прв пат се предвидува и кариерен развој во секторот детска заштита, со што се враќа достоинството на вработените во градинките. Зголемувањето на платите, но и започнатите реформи беше тема на денешниот состанок на министерката за труд и социјална политика Мила Царовска со директорите на градинките од цела Македонија. Процесот на јакнење на детската заштита продолжува и годинава со зголемување за 300 отсто на буџетот за капитални инвестиции во градинки. Со дополнителни 15 милиони евра од Светска банка се обезбедува простор за околу 7.000 нови деца во градинките, но истовремено работиме и на јакнење на кадрите“, се вели во соопштението.


Само пет отсто од училишните деца не се вакцинирани со МРП 


Скопје, 24 јануари, 2019 - 16:00 (META) 

Теренска вакцинација не се случи на првиот ден од второто полугодие, затоа што според податоците, само пет отсто од училиштните деца не се вакцинирани со МРП вакцина, што не е голем процент, велат за „Мета“ во Министерството за здравство.

– Комисијата за заразни болести на последниот состанок одлучи да не се продолжи зимскиот распуст, затоа што бројот на вакцинирани ученици со МРП е висок, односно само пет отсто од вкупниот број не ја примиле вакцината. Сепак, родителите на овие деца ќе бидат повикани преку училиштата да ги однесат на вакцинација. Кај нас во принцип нема отпор за невакцинирање. Проблемот е во тоа што постои неоправдан страв од МРП вакцината дека предизвикува аутизам и други заболувања, но во пракса, кога детето ќе прозбори и прооди, родителите ги носат на вакцинирање – информира Марија Тасев, портпарол во министерството.

Таа додава дека заклучно со денеска до 15 часот, од почетокот на епидемијата, досега вакцина примиле вкупно 4.070 лица. Во моментов вкупниот број на заболени од морбили е 75 лица, а се очекува со свежи бројки утре да излезат одговорните во Институтот за јавно здравје.

Претседателката на Комитетот за имунизација проф. Александра Грозданова, го повтори апелот родителите да ги вакцинираат своите деца.

– На почетокот од епидемијата, во Скопје имаше 15.000 невакцинирани деца. Оттогаш, оваа бројка е намалена за речиси една третина, што ги задволува очекувањата. Сепак, останува апелот родителите да вакцинираат – вели Грозданова за „Мета“.


Распустот нема да продолжи, од утре сите на школо


Скопје, 22 јануари, 2019 - 14:54 (META) 

Министерството за образование и наука соопшти дека од утре учениците се враќаат на настава. Распустот беше два дена продолжен поради загадувањето на воздухот.

„Согласно препораките на Министерството за животна средина и просторно планирање, а имајќи ги во предвид и препораките на Интерсекторската работна група за следење на состојбата со квалитетот на амбиенталниот воздух, Министерството за образование и наука информира дека второто полугодие започнува утре, и тоа за сите ученици од јавните и приватните основни и средни училишта во сите општини во Република Македонија“, информираат оттаму.

Денеска во Владата информираа дека мерките и препораките за заштита од загадувањето што ги воведе завчера Владата, од утре престануваат да важат бидејќи концентрациите на ПМ10 честичките се под дефинираниот праг на алармирање од 200 микрограми на еден кубен метар, соопштија денеска од Владата.

Во соопштението се наведува дека прагот за алармирање на суспендирани честички со големина до 10 микрометри (надминување на вредноста од 188 микрограми на еден кубен метар во текот на два последователни денови) и добиената временска прогноза од Управата за хидрометеоролошки работи, е надминат на мерното место Струмица, за каде остануваат во сила мерките и препораките.


Царовска: Децата од домот „11 Октомври“ преселени во мали групни домови


Скопје, 21 јануари, 2019 - 15:03 (META) 

Децата во Домот за деца без родители „11 Октомври“ во Скопје, од пред неколку дена се сместени во четири мали групни домови и згрижувачки семејства.

Министерката за труд и социјална политика Мила Царовска и претставникот на УНИЦЕФ во Македонија, Бенџамин Перкс денеска ги посетија децата кои што од неодамна се сместени во една од куќите во Скопје.

„Како што ветивме, до почетокот на второто училишно полугодие го трансформиравме и домот „11 Октомври“. При тоа водевме сметка децата да останат во близина на училиштето кое што го посетуваат и да не ги разделуваме децата кои што се братчиња и сестрички. Процесот на деинституционализација тече подобро од очекуваното, досега бројот на деца сместени во институции се намали за 60 проценти. Нашите заложби како Влада се до 2020 година да нема повеќе деца под 18 години во големите институции. Секое дете заслужува да расте со семејство, да чуствува вистинска грижа и топлина. Продолжуваме да работиме на отворање на мали групни домови, каде децата имаат услови за живот како во вистински семеен дом. Ги охрабрувам и сите оние кои се заинтересирани да станат згрижувачи да го направат овој чекор и да го отворат својот дом и срце за нов член на семејството“, изјави Царовска.

Процесот на деинституционализација МТСП го спроведува во партнерство со УНИЦЕФ, УНДП и Делегацијата на ЕУ во Македонија.

„Многу земји од ЕУ, преку систематски реформи и кампањи за промена на ставовите, прераснаа во места каде што сместувањето на деца во институции веќе не се прифаќа. Со затворањето на претпоследната институција за деца во земјата се доближуваме до остварување на таа иста цел“, рече Бенџамин Перкс, претставник на УНИЦЕФ.

Пред околу четири месеци целосно беше трансформиран и домот „25 Мај“ и сите 25 деца сега живеат во пет мали групни домови во Скопје и се вклучени во редовниот образовен процес. Исто така, до крајот на минатата година од Специјалниот завод „Демир Капија“ беа извадени сите деца до 18 години и сместени во мали групни домови каде што добија 24 часовен надзор, и индивидуализирани програми и дефектолошки третмани.


Детската клиника и болницата во Козле – полни со деца со респираторни заболувања


Скопје, 21 јануари, 2019 - 13:36 (META) 

Клиниката за детски болести како и Институтот за белодробни заболувања Козле, се полни со пациенти. Во овој период од годината, преовладуваат респираторните дијагнози а една од причините е енормно загадениот воздух.

– Болницата е полна. Имаме 130 пациенти кои се хоспитализирани и околу 30 кои се во дневна болница, a вкупно капацитетот е околу 180 места – информира за ,,Мета” д-р Катарина Ставриќ, директорката на Детска клиника.

Пациентите, додава таа, се со респираторни заболувања, но има и деца со други болести и инфекции.

– Факт е дека периодов е загаден воздухот, таква е сезоната, но не се само респираторни дијагнози во прашање – вели Ставриќ.

Голем број пациенти се хоспитализирани и во „Козле“. Најчесто поради бронхити, опструкции и пневмонии, но има и деца-пациенти со ларингитис.

Владата вчера донесе одлука да се одложи за два дена почетокот на учебната година поради енормното загадување на воздухот.


Седум нови сомнителни случаи на заразени од морбили


Скопје, 10 јануари, 2019 - 13:37 (META) 

Седум нови сомнителни случаи на заболени од морбили се пријавени денеска во Институтот за јавно здравје. Прим. д-р Гордана Кузмановска, епидемиолог во Институтот, нагласува дека ова не се регистрирани случаи, туку за нив допрва ќе следат лабораториски анализи и испитувања, а потоа ќе види дали ќе бидат потврдени случаи или не.

– Сомнителните случаи се добиени од Инфективната клиника. Тие чекаат лабораториска дијагностика, а дополнително ќе се знае дали ќе добиеме пријава дека се работи за заразна болест. Во новата епидемија, на територија на Скопје, без оние седум случаи од Радишани, во моментов има 13 потврдени случаи – информира д-р Кузмановска.

Како што неофицијално дознава „Мета“, станува збор за деца од градинка во Аеродром.

Од 3 јануари е прогласена епидемија на морбили на ниво на Скопје. Во исто време беше донесена мерка за забрана за прием на невакцинирани деца со МРП вакцина. Од денот на забраната, досега вакцинирани се над 1.300 деца.

Државниот санитарен и здравствен инспекторат врши контроли по градинки, дали тие примаат деца кои не ја имаат примено оваа вакцина. Директорката Ирина Бухова за „Мета“ информира дека до овој момент не се регистрирани случаи на примање невакцинирани деца.

– Ние можеме да правимe проверки само кај што има решение за забрана. Затоа нашите инспектори делуваат само во Скопје. Во моментов нема пријави за примени невакцинирани деца во градинка – вели Бухова.


Казна до 4.000 евра за градинките ако инспекторите „фатат“ невакцинирано дете


Скопје, 8 јануари, 2019 - 13:10 (META) 

Државните здравствени и санитарни инспектори, од денеска продолжуваат со контроли по градинките, по времената мерка забрана за прием на невакцинирани деца со МРП вакцина, информира за „Мета“ директорката на инспекторатот, Ирина Бухова.

– Нашите инспектори се на терен откако започна забраната. Од сите градинки кои досега се поминати на територија на Скопје, во ниту една не беа направени отстапки. Но, морам да нагласам дека сепак најверојатно поради празниците и распустот, во градинките беа згрижени многу мал број на деца. Од денеска контролите продолжуваат и ќе траат се` додека е на сила решението за забрана за прием на невакцинирани деца – информира Бухова.

Таа потсетува дека има парични казни за правното и за одговорното лице во случај во некоја градинка да се затекнат деца без примена вакцина.

– Казната за правното лице се движи од 2.000 до 4.000 евра, а одговорното лице треба да плати 30 отсто од одредената сума за правното лице – вели директорката.

Инаку денеска во 17 часот е најавен протест на членови на движењето „Вакцинацизам“, пред Министерството за здравство, кои се против ваквата забрана. Тие протестираа и пред неколку дена, а изјавија дека паричните казни нема да ги предомислат и дека ќе ги оставаат децата во градинка, со и без дозвола на надлежните.

Министерството за здравство прогласи епидемија од морбили на 3 јануари. За прв пат се донесе мерка – забрана за прием на невакцинирани деца со МРП вакцина за морбили, рубеола и паротитис. За да можат да посетуваат градинка, наложено е прво да појдат на вакцинација. Оттогаш досега, како што информираат во Министерството за здравство, вакцинирани се повеќе од 1.000 деца.


Филипче: Невакцинирани деца нема да се примаат ниту на училиште


Скопје, 3 јануари, 2019 - 23:06 (META) 

Нашите заложби се во насока вакцинацијата да стане задолжителна и невакцинираните деца да не смеат да се примаат ниту во градинка, ниту во училиште, изјави во гостувањето на „1тв“ министерот за здравство, Венко Филипче. Тој најави дека се подготвуваат законски измени, според кои, дете кое не е вакцинирано, нема да може да биде примено во градинка или на училиште.

– Тоа е единственото, вистинско и долгорочно решение. Заради тоа што во многу земји во светот каде ги имале сите овие исти проблеми, така го решиле проблемот, со задолжителна вакцинација. На последниот состанок инициран од Светската здравствена организација, пред неколку месеци во Подгорица, на која главна тема беше имунизацијата, се разговараше за истите овие проблеми, типот на вакцини, опфатот на имунизација. Истите проблеми ги имаат сите земји во регионот, ги имаат развиените земји, ги има Израел. Израел го решил проблемот со тоа што станала вакцинацијата задолжителна, тие немаат проблем со вакви заболувања – вели Филипче.

Според него, има европски земји во кои вакцинирањето е мандаторно.

– Тие земји, Италија Франција, Финска и Романија, заради појава на многу поголеми епидемии со смртни случаи, сега ги менуваат законите. Ги прават такви, вакцинирањето да е задолжително. Дали бројката од 12 случаи на заболени од морбили е доволна за да се прогласи епидемија? Одговорот е „да“. Романија не може да ја смири епидемијата веќе две години, а смртни случаи има и во Србија, а тоа е доволен показател за нас да преземеме вакви мерки – додава министерот.

Правото на детето да биде вакцинирано и заштитено од болести, смета тој, е поважно од волјата на родителот.

– Колективното право и јавното здравје е поважно да го штитиме отколку индивидуалното. Секој си одговара за своето здравје, но никој нема право да го загрозува општото здравје. Што ќе се случи ако умре некое дете? Кој ќе одговара ако заболи некое дете кое не можело да се вакцинира од икс причини и, не дај боже, умре? Ние имаме сериозна обврска пред нас, да преземеме чекори кои ги презимаме, за да го заштитиме јавното здравје. Се` дoдека има можност децата да се запишуваат во јавни установи и притоа не се вакцинирани, ние проблемот нема да го решиме – дециден е министерот.

Министерството за здравство прогласи епидемија на мали сипаници на ниво на Скопје, поради  12 нови случаи и донесе и забрана за носење во градинка на деца кои не примиле МРП вакцина


До 15 часот вакцинирано е вкупно 371 дете на територија на Скопје


Скопје, 3 јануари, 2019 - 15:45 (META) 

Денеска до 15 часот вакцинирано е вкупно 371 дете на територија на Скопје со вакцината МРП (морбили, рубеола и паротитис), информираа Министерството за здравство.

Оттаму велат и дека за две од шестмината новозаболени лица од морбили е добиена лабораториска потврда, а за две од нив резултатите се негативни.

Кај еден случај на болно дете се прават дополнителни лабораториски испитувања.

„Министерството за здравство апелира до сите родители да ги вакцинираат децата со МРП вакцина. Потсетуваме дека се` уште е на сила наредбата дека децата, кои се невакцинирани нема да бидат примени во детските градинки, со цел да се спречи ширењето на епидемијата прогласена во Скопје. Во соработка со Здравствен дом – Скопје воведуваме и втора смена во поликлиниките, каде се врши вакцинација, односно вакциналните пунтови во поликлиниките „Букурешт“, „Бит Пазар“ и „Јане Сандански“ ќе работат до 19 часот“, информираат во МЗ.

Оттаму напоменуваат дека МРП вакцината е висококвалитетна. Производител е компанијата „GlaxoSmithKline“ од Белгија.