fbpx

Зеленски не кажал дека наскоро ќе го убијат

Од одговорот на Зеленски е евидентно дека тој зборува за план наречен „Мајдан 3,“ кој му го кажале службите дека до крајот на годината Русија наводно има план да го промени претседателот на Украина. Но, Зеленски воопшто не кажува дека тој смета оти планот ќе се оствари

-

Украинскиот претседател Володимир Зеленски нема изјавено дека наскоро ќе го убијат, туку одговарајќи на прашање на новинарот на „Сан“, кажа дека има сознанија за операција наречена „Мајдан 3“ за која го информирале службите а според која Русија планира промена на претседателот на Украина. Но, Зеленски вели: „Гледате, можеме да живееме со тоа“ и никаде не кажува дека таквата операција ќе се оствари. Во објавата, исто така, надвор од контекст е пренесен став на Далас МекГрегор, кој кажува негово лично мислење и хипотеза, а истото во објавата е пренесено како случен факт, пишува „Вистиномер“ во својата анализа.

Текстот подолу го пренесуваме во целост:

 

Рецензираме објава на социјалната мрежа Фејсбук во која пишува:

Зеленски: Наскоро ќе ме убијат, Москва ќе ги искористи сите средства за да ме тргне.

Во написот кој е дел од објавата пишува дека Зеленски дал ваква изјава „по најновата офанзива на Украина која не ги даде очекуваните резултати“.

Во вториот дел од текстот споделен во објавата што ја рецензираме, пишува дека:

Даглас Мек Грегор, поранешниот советник на Пентагон открива дека западните лидери доаѓаат кај Зеленски и насамо му кажуваат дека тој стана „лице на војната“ и дека затоа мора да му отстапи место на некој што може да склучи договор со Русија.

Во текстот пишува дека Мек Грегор наводно изјавил:

Му велат господине Зеленски, вие сте лице на војната, некој друг мора да дојде на ова место, да се сретне со Русите и да го потпише документот за трансфер на територија и сè што сака Русија. Овој конфликт мора да заврши, бидејќи веќе не сме во можност да ве поддржиме.

„Вистиномер“ го пронајде интервјуто на Мек Грегор од кое се гледа дека изјавата во објавата што ја рецензираме е пренесена неточно.

На 26 минута и 29 секунда Мек Грегор вели:

МИСЛАМ дека она што му го велат оди во насока да му стават весело лице, кога војната е загубена, Русите може да влезат во Киев. МИСЛАМ дека второто нешто што ќе му го кажат е дека е време да се повлечете господине Зеленски, вие сте лицето на војната, некој друг мора да дојде да ги собере остатоците, да ги потпише документите за прераспределба на териториите како што Русија сака и да заврши војната, бидејќи не сме во состојба да ве поддржуваме повеќе. МИСЛАМ дека тоа му го велат приватно, насамо.

Евидентно е дека изјавата е хипотеза и лично мислење на соговорникот Мек Грегор, а не некаков факт како што тоа е претставено во текстот од објавата што ја рецензираме.

Што се однесува до директниот цитат во насловот: „Зеленски: Наскоро ќе ме убијат, Москва ќе ги искористи сите средства за да ме тргне“, Вистиномер не пронајде ваква изјава од претседателот на Украина Володимир Зеленски.

Она кое постои, е интервју што Зеленски го дал за „Сан“ на 20 ноември 2023 година во која одговара на прашање поврзано со обидите за негов атентат. На самиот почеток на интервјуто, новинарот му вели дека на почетокот на состанокот се слушнало за бројни обиди за негов атентат, па прашањето е за колку обиди за атентат чул Зеленски и каква тежина тоа носи за него како човек.

-Нормално. Мислам дека првиот е многу интересен. А после тоа, е како ковид. Прво луѓето не знаат што да прават со него и многу е страшно, а после тоа службите само споделуваат со вас дека уште една група дошла во Украина за да го спроведе ова. 

На прашањето колку вакви обиди имало, Зеленски му одговара на новинарот:

-Навистина не знам, но мислам не помалку од 5 или 6. Интересно е дека последната информација е дека планираат, како што споделив со вас надвор кога се сретнавме на почетокот, дека имаат име на операцијата „Мајдан 3“ и значи „да се смени претседателот“. Можеби не е преку убиство, значи да се промени претседателот. Би искористиле секакви инструменти што им се на располагање. Идејата на операцијата е ова да се случи до крајот на годината. Но, како што гледате, можеме да живееме со тоа.

Од одговорот на Зеленски е евидентно дека тој зборува за план наречен „Мајдан 3,“ кој му го кажале службите дека до крајот на годината Русија наводно има план да го промени претседателот на Украина. Но, Зеленски воопшто не кажува дека тој смета оти планот ќе се оствари. Никаде во интервјуто не вели „Наскоро ќе ме убијат“.

Поради сите горенаведени факти, објавата која ја рецензираме ја оценуваме како невистина. Не е точно дека Зеленски рекол дека наскоро ќе го убијат, ниту пак пренесениот дел од Мек Грегор е остварена реалност, туку е негово размислување односно хипотеза т.е негово мислење.

Нашите вести во вашето сандаче

Секој ден во 17 ч. добивајте ги вестите од Новинската агенција Мета директно на вашата електронска адреса.

Ве молиме одберете на кој начин сакате да добивате информации од нас:
Можете да се отпишете од оваа листа преку линкот на крајот од нашите пораки.

Гордана Силјановска-Давкова официјално е претседателски кандидат на ВМРО-ДПМНЕ

Гордана Силјановска-Давкова и официјално ќе влезе во трката за претседател на државата, како кандидат на ВМРО-ДПМНЕ. Таа денеска со мнозинство гласови беше избрана на Kонвенцијата која се одржа во...