Новинарката на „Фокус“ Ирена Мулачка во интервју за новинската агенција „Макфакс“ зборуваше за патот на злоупотребата на лекови на скопската Клиника за онкологија, потенцирајќи дека биолошката терапија што требало да ја примаат пациентите болни од рак се препродавала најверојатно во Косово, а во разработената шема учествувале одделни лекари, поранешни директори, медицински и одделенски сестри, благајни, возачи, секретари и чувари.
Од ВМРО-ДПМНЕ денеска прашаа како директор на Клиниката за онкологија извадил документ за канцер за мајка си и уште колку заведени со фалсификат има на оваа клиника на штета на болните.
„Онкологија поседува КАТО систем од 2016-та година и има обучен персонал за него. Систем вреден тогаш 350.000 евра. 2017-та година, СДС ја презема власта, го поставува својот Нино Васев за директор, а тој го укинува, исклучува, затвора системот, според медиумите, „ќе заштедел на ќеси“!? Оттогаш почнува криминалот на штета на пациентите, со допишување фиктивни пациенти, продажба на лекови. Криминалот е толкав што директор на Клиниката вади документ со лажна дијагноза – за рак на бели дробови на име на мајката. Па, како се вади лажна документација за канцер? Колку такви пациенти се запишани? Што се се случува на Онкологија“, праша денеска портпаролот на ВМРО-ДПМНЕ Наум Стоилковски.
Министерот за здравство Фатмир Меџити денеска потенцираше дека ќе соработуваат со надлежните институции за најригорозно казнување на поединците кои правеле нерегуларности.
„Не знам како било досега, но со мене ќе се постапува најригорозно каде има злоупотреба и нерегуларности“, рече Меџити.
Министерот за здравство додаде дека на Клиниката за онкологија има врвни професионалци и не можеме да се водиме од тоа кој-што кажал, туку дека одговорноста треба прецизно да се лоцира на поединци.
Премиерот Димитар Ковачевски денеска беше дециден оти во овој случај нема да има пардон за никого и дека на секоја владина седница ќе го поставува прашањето до каде е постапката за правно разречување на случајот.
Ковачевски рече дека како влада се транспарентни и отворени за да придонесат за побрзо разрешување на случајот, дека ќе има точно име и презиме за тоа кој се огрешил, за да не биде под притисок ставена целата лекарска фела.
Премиерот додаде дека до Министерството за внатрешни работи и Обвинителството се доставени сите документи и материјали. Дополнително, новата директорка на Клиниката за онкологија направила кадровски промени, а на оние лица кои во минатото не се придржувале до процедурите, на некои им е прекинат и работниот однос.
Ковачевски рече дека вниманието како премиер е 100% насочено кон разрешувањето на овој случај. Тој очекува за прекршените постапки и злоупотреби да бидат казнети со закон одговорните лица.
