Неочекуваната разврска на кризата со двајцата грчки војници што по пет месеци заробеништво во Турција беа ослободени, нема премногу да ја успокои владата на Грција, која на крајот на летото и на почетокот на есента ја очекуваат многу клучни прашања од надворешната политика.
Најважното е секако референдумот во Македонија за Договорот од Преспа, но и тоа што ќе се случи ако Панос Каменос, лидерот на Независни Грци, коалицискиот партнер на Сириза, ги оствари заканите да не го поддржи договорот при ратификацијата во парламентот.
Иако заробувањетo на двајцата грчки војници беше сериозен оган во грчко-турските односи, но кипарското прашање и плановите на „Ексон Мобајл“ в септември повторно ќе го актуелизира прашањето дали постои вистинска волја за квалитетно подобрување на односите меѓу двете држави. Атина посебно очeкува како на почетокот на дупчењето во Кипарската ексклузивна економска зона ќе реагира турскиот претседател Реџеп Таип Ердоган.
Во тој контекст, на 11 септември, посредничката Џејн Хол Лат од Обединетите Нации ќе дојде во Атина за средба со грчкиот министер за надворешни работи Никос Коѕиас, пред почетокот на новата рунда преговори за кипарското прашање.