Еден од последните позначајни бизнисмени од транзицискиот период во Бугарија, Алексеј Петров денеска е убиен во софискиот кварт „Драгалевци“, јавува mediapool.bg. Првичните информации говорат дека кон него било стрелано од пушка, а во моментот Петров имал тројца телохранители. Убиениот имал обичај да се шета на локацијата каде било пукано.
Во последниве две децении врз Алексеј Петров биле извршени два неуспешни атентати – во 2002 и во 2015 година. Инаку, тој има матно транзициско минато. Петров во 2010 година бил приведен и обвинет дека е водач на криминалната крупа „Октопод“, која се занимавала со рекет и изнуда.
Обвинителниот акт поднесен за време на првата влада на Бојко Борисов заврши со ослободување на Петров, по што бугарската држава мораше да плати десетици милиони евра обесштетување на него и неговата компанија.
Според неговата официјална биографија, Алексеј Петров бил поранешен член на специјална антитерористичка единица, а по заминување од единицата почнал приватен бизнис. Бил познат како сопственик на осигурителната компанија „Аполо и Балкан“.
Поранешниот бугарски премиер Кирил Петков се огласи со реакција по убиството на Петров, барајќи итна реформа на безбедносниот сектор на земјата.
„Време е за итни и длабоки реформи. Ќе работиме заедно со владата за да постигнеме вистински и брзи резултати“, напиша Кирил Петков, кој е копретседател на коалицијата Промените продолжуваат – Демократска Бугарија што е дел од актуелната бугарска влада.