Дванаесетгодишно дете од тетовската населба Дреновец почина откако врз него паднала метална шибер-врата во дворот на фабриката „Солидпласт“ во Непроштено.
Трагичниот настан се случил вчера, околу 16 часот, кога детето се обидело да ја отвори вратата додека неговиот дедо и уште едно лице го паркирале автомобилот во дворот со кој заедно пристигнале.
Во тој момент вратата паднала, а 12-годишникот се соочил со тешки телесни повреди и во тетовската клиничка болница бил донесен без знаци на живот.
Јавен обвинител и екипа од Секторот за внатрешни работи Тетово, извршија увид на местото на повредувањето, кое е фотодокументирано, а подигнати се и траги за вештачење.
Се работи на целосно расчистување на сите детали поврзани со случајот, додека по барање на семејството, безживотното тело на детето е предадено за погребување.
З.Д.
