Повеќето училишта во Иран утре ќе бидат затворени поради високото ниво на загадување на воздухот кое веќе неколку дена ги надминува дозволените вредности.
Училиштата ќе бидат затворени во Техеран и во околните градови, како и во провинцијата Алброз, во западниот дел на Иран. Властите одлучиле да ги затворат училиштата и во централните индустриски градови Арака и Исфахан.
Властите им препорачаа на постарите лица, децата и на лицата со кардиоваскуларни проблеми да не излегуваат на отворено. Сите спортски натпреварувања се откажани, а медицинските установи се подготвени за прием на зголемен број болни лица.
Нивото на загадување на воздухот достигнало 148 мерни единици, додека максималното ниво, според Светската здравствена организација, е 50.
Околу 80 отсто од загадувањето во Техеран е предизвикано од издувните гасови на околу пет милиони автомобили и речиси исто толку мотоцикли.
