Социјалдемократскиот сојуз денеска во препознатлив стил се обиде да ја манипулира јавноста и да лаже дека ВМРО-ДПМНЕ стои зад одлуката на Уставниот суд, велат од владејачката партија и додаваат дека нивните сомнежи се дека токму СДСМ „има најголем интерес за една ваква одлука“.
Од ВМРО-ДПМНЕ велат дека тие и покрај противењето на СДСМ во 2009 година ги предложиле измените во Законот за помилување со кои не може да има помилување за одредени категории на осуденици, односно за тие на кои им е одредена казна за дела поврзани со изборите, педофилија и слично.
„ВМРО-ДПМНЕ останува со ист став и денес. Секој што сторил каков било криминал, треба да одговара. Таков беше ставот и кога обвинетиот криминалец Зоран Заев беше аболициран од Бранко Црвенковски. СДСМ денеска во препознатлив стил се обиде да ја манипулира јавноста и да лаже дека ВМРО-ДПМНЕ стои зад одлуката на Уставен суд. Затоа ВМРО-ДПМНЕ отворено се сомнева дека токму СДСМ има најголем интерес за една ваква одлука. Впрочем, медиумите неодамна објавија дека Специјалното јавно обвинителство без основа го побарало и предметот за педофилија кој се води против членови на семејството на Зоран Верушевски, осомничен во предметот „Пуч“ и близок соработник на Зоран Заев“, стои во соопштението на ВМРО-ДПМНЕ.
