Универзитетски професори од Балканот, учесници на 10. Меѓународен конгрес во Охрид, расправаат на тема „Образованието и глобализацијата“. Организатори на собирот се Педагошкиот факултет „Свети Климент Охридски “ и педагошките факултети од Тракиските универзитети од Едрене и од Стара Загора, како и Учителскиот факултет од Загреб.
На овој стручен собир ќе бидат претставени повеќе од 200 научни трудови на учесници од повеќе балкански земји.
Деканот на Педагошки факултет „Свети Климент Охридски“, професор д-р Владо Тимовски, нагласи дека расправата на Конгресот е поделена на четири тематски целини, кои ќе донесат различни поттеми поврзани со развојот на образовниот процес.
– Учесниците, главно, ќе се задржат на историските и на општествените аспекти на современото образование, реформите во образованието и на иновациските процеси, како и на современите тенденции во предучилишното, основното, средното и во високото образование. Посебен аспект ќе се даде на прашањето на формирањето на наставнички кадри, а ќе се дискутира и за образованието како развојна компонента на современото општество, за уметноста, културата и за спортот, за математичките и за природонаучните образовни содржини, за улогата на библиотеките во образованието, за мултикултурното образование, за вреднување на квалитетот на образованието, како и за информатичките технологии во образовниот процес – рече Тимовски.
Деканот на Учителскиот факултет од Загреб, проф. д-р Иван Прскало, смета дека 10. Конгрес во Охрид ќе овозможи размена на искуства со оглед на тоа што воспитно-образовниот процес е многу важна општествена функција што треба да се усовршува.
– Единствениот начин на усовршување на овој процес е отворање на границите и размена на идеите. Реформите некогаш одат во позитивна, а некогаш во негативна насока, но дефинитивно, и образованието претрпе демократски промени. Индивидуализацијата која од средината на минатиот век беше врзана за политичките појави што се случуваа во Европа и во светот, во прв план го ставаше детето, а не општеството. Човекот беше во функција на одбрана на општеството. Денес идеалот е општеството да биде посветено на детето, на неговиот развој и креативност. Таквите промени се одразија секаде и тие се неминовни – нагласи Прскало.
Како продолжение на Конгресот „Образованието и глобализацијата“ што ќе трае до утре, на 21 септември во Скопје е предвидено да се одржи Конференција за спортот и физичката култура и за образованието, на која ќе присуствуваат истакнати научни и стручни работници од повеќе европски држави.
