Унгарските избирачи денеска на референдум гласаат за задолжителните квоти на ЕУ за населување на мигранти во Унгарија.
Прашањето на анкетата гласи: „Сакате Европската Унија да има право да наредува задолжително населување на неунгарски граѓани во Унгарија без согласност на парламентот?“.
Под „неунгарски граѓани“ се имаат предвид мигранти кои побарале азил во ЕУ.
Референдумот беше организиран како одговор на планот усвоен од Брисел за прераспределба на 160.000 кандидати за азил меѓу 28-те членки на блокот.
За да биде валиден референдумот, на него треба да гласаат повеќе од 50 проценти од гласачите, кои се 8,27 милиони на број.
И покрај огромниот број на агитациски билборди, рекламни материјали и настапи на министри и на пратеници во целата земја, кои ги повикуваат луѓето да гласаат, според социолозите во земјата, нема гаранција дека ќе биде достигната потребната излезност.
Очекувањата се дека оние кои одат да гласаат, масовно ќе се искажат против задолжителните квоти.
Премиерот Виктор Орбан се надева дека референдумот ќе ја даде на неговата влада поддршката од која има потреба, за да се спротивстави на какви било идни планови на ЕУ за распределување бегалци меѓу земјите-членки, забележуваат агенциите.
Орбан сака да го сопре доаѓањето на голем број мигранти муслимани во Европа, кои, според него, се закануваат како на Унгарија, така и христијанската природа и култура на континентот. Унгарскиот премиер вели дека ЕУ треба да ја заостри контролата на надворешните граници, за да не им овозможува на мигрантите да влегуваат, слично како што има направено Унгарија, издигајќи огради по јужните граници со Србија и со Хрватска.
Околу 400.000 мигранти поминаа низ територијата на Унгарија минатата година на пат за Западна Европа, пред земјата да издигне огради по јужните граници кои го сопреа речиси целосно протекот на илегални мигранти. Минатата година Унгарија даде азил само на 508 бегалци, а оваа година се очекува да прифати приближно ист број.
