Најмалку седум цивили денеска загинаа во гранатирањето на источниот украински град Краматорск, со што бројот на жртвите во последните 24 часа се зголеми на 21. Нападите доаѓаат еден ден пред состанокот во Минск, на кој европските, руските и украинските челници треба да го договараат мировниот план, кој се смета за последна шанса за мир.
Како што соопшти украинскиот претседател Петро Порошенко, Краматорск е погоден од ракетен фрлач од типот „торнадо“. При нападот загинале седум лица, а 26 се ранети.
Засега нема потврдени информации за евентуални жртви меѓу војниците.
Како што наведува украинската војска, ракетите се испукани од Горливке, град кој е под контрола на проруските сили, а се наоѓа на 45 километри од Краматорск. Проруските сили демантираат дека го гаѓале градот.
