Logo

Оди на содржината

предлог-закон

Владата го усвои предлог-законот за ратификација на Спогодбата со Грција

Скопје, 18 јуни, 2018 - 11:46 (META) 

Владата на денешната 74-седница го разгледала и усвоила Предлог – закон за ратификација на Конечната спогодба за решавање на спорот за Грција и за воспоставување на стратешко партнерство помеѓу страните, кој бил предложен од Министерството за надворешни работи.

Предлог-законот за ратификација, со европско знаменце на него, како приоритетен, треба да биде доставен до Собранието на Република Македонија.

Исто така, според соопштението, на денешната седница на владата е разрешен директорот на затворот во Прилеп, Слободанчо Ристески.

Медиумските закони денеска на собраниска комисија

Скопје, 2 мај, 2018 - 13:40 (META) 

Во Комисијата за транспорт, врски и екологија во Собранието денеска ќе се расправа за предлог – закон за изменување и дополнување на Законот за аудио и аудиовизуелни медиумски услуги и за предлог – закон за изменување и дополнување на Законот за основање на Јавно претпријатие Македонска радиодифузија, и двата во второ читање. Со законите се овозможува, според Владата, која ги предлага законите, професионализација и независност на Советите на Агенцијата за аудио и аудиовизуелни медиумски услуги (ААВМУ) и на јавниот радиодифузер Македонска радио телевизија (МРТ).

Освен тоа, во Собранието, членовите на Комисијата за надворешна политика ќе расправаат по предлог-законите за ратификација на Спогодбата меѓу Република Македонија и Република Бугарија за соработка во случај на катастрофи и за ратификација на изменувањата на протоколот 2 кон договорот за слободна трговија меѓу Република Македонија и Република Турција.

Овие точки се на дневен ред и на Законодавно-правната комисија.

На седницата на собраниската Комисија за еднакви можности на жените и мажите ќе се одржи јавна расправа на тема „Извештај за напредокот на Република Македонија од страна на Европската комисија за 2018 година, со посебен осврт на делот за родова рамноправност“.

Брисел ќе забрани продажба на второкласни производи во Источна Европа

Брисел, 11 април, 2018 - 16:23 (META) 

Европската комисија подготвува предлог-закон со кој ќе се регулира различниот квалитет на навидум исти производи на пазарот во Европска Унија. На овој начин, потрошувачите ќе се заштитат од продажба на производи кои се рекламираат како исти, а имаат значајни разлики во составот и карактеристиките.

– На почетокот на мандатот, од Европска комисија ми рекоа дека се додека производот е сигурен за здравјето, проблем за нив нема. Како да ние треба да бидеме благодарни што нe нè трујат. За неколку години стигнавме до предлог-закон со кој треба да се регулира целиот пазар на Европска Унија – изјави хрватската европратеничка Билјана Борзан.

Овој законски предлог е дел од големиот пакет кој Европската комисија го подготвила за потрошувачите, а тој вклучува и закон кој го регулира правото на колективна тужба.

– Скандалот со „Фолксваген“ покажа дека европските купувачи останаа незаштитени, за разлика од американските. Во случај на двоен квалитет треба да се има можност за колективна тужба. Ако законот стапи на сила, тоа ќе значи дека еднаквоста на сите граѓани ќе се почитува – додаде Борзан.

Европска комисија предвдува 800.000 евра за истражување на квалитетот на производите кои се навидум исти.

Предлог-законот за финансиска поддршка на инвестициите денеска на собраниска комисија

Скопје, 4 април, 2018 - 10:11 (META) 

Предлог-законот за финансиска поддршка на инвестициите денеска ќе се разгледува на седница на Комисијата за економски прашања на Собранието, која започнува во 13.30 часот.

Овој предлог-закон овозможува државна финансиска поддршка за нови инвестиции и нови подобро платени работни местa, технолошки развој и внесување на иновации на компаниите, со што ќе се зголеми конкурентноста на македонските компании, а целта е да се зголеми извозот и да се постигнат повисоки стапки на економски пораст.

„Со Законот се овозможува примена на мерките од првиот и вториот столб од Планот за економски пораст, усвоен од Владата во декември 2017 година.  Планот за економски пораст е креиран во соработка со Стопанските комори, академската заедница и невладиниот сектор, се организираа повеќе активности и јавни трибини на кои се дискутираше за мерките од планот, а Законот со кој се планира да се имплементират мерките беше јавно достапен на увид на целата јавност и преку Единствениот електронскиот национален регистар на прописи (ЕНЕР)“, информираат од Влада.

Владата утре ќе усвои предлог-законите за судовите и за Судскиот совет

Скопје, 5 март, 2018 - 16:42 (META) 

На својата 57-ма седница, утре Владата  ќе ги усвои и предлог-законот за изменување и дополнување на Законот за Судски совет на Република Македонија, како и предлог-законот за изменување и дополнување на Законот за судовите.

Измените на овие два закона се дел од реформите во правосудството од планот „3-6-9“ на Владата.

Со измените на законот за судовите се предвидува судија да може да биде разрешен и ако не носи судиска тога, а наспроти досегашните санкции за примање мито, судиите дополнително ќе треба да одат на стручна дообука во Академијата за судии и јавни обвинители.

Со измените се менуваат и условите за судиите-поротници. Поротник ќе може да се стане и со средно образование, наместо со високо, како што е сега.  Со новите предлог-решенија, Министерството за правда ќе врши надзор над спроведувањето на Судскиот деловник, конкретно на функционирањето на Автоматизираниот компјутерски систем за управување со судските предмети (АКМИС).

Според дневниот ред, владиниот кабинет утре ќе решава и неколку други крупни работи, како што се спојување на Здравствениот дом Кочани со Општата болница, но и за концесии за експлоатација на минерални суровини, а како 48-ма точка ќе се дискутира и за „Иловица“, односно за предлог-одлука за изменување на Одлуката за доделување на концесија за експлоатација на минерална суровина – бакар и злато на „Еуромакс Рисорсис ДОО Скопје“ на локалитетот во Општина Босилово и Општина Ново Село.

Ќе се расправа и за квалитетот на воздухот во јануари годинава, како и за работите на автопатот Демир Капија – Смоквица.

Предлози за членови на Советот на јавни обвинители и за уставен судија во Собранието

Скопје, 1 март, 2018 - 10:14 (META) 

Четири комисии на Собранието денеска ќе заседаваат разгледувајќи десетици предлог-закони, но и кадровски решенија за клучните позиции во правосудството.

Комисијата за прашања на изборите и именувањата ќе утврдува предлози за членови на Советот за јавни обвинители, но ќе избере и кандидат за судија на Уставниот суд.

На другите комисии ќе се расправа за низа предлог-закони со кои ќе се воведе АПТИС тестот за англиски јазик за раководители на различни нивоа и во различни институции, но и е се исфрла психолошкиот тест како услов за вработување на ваквите кадри.

Ќе се расправа и за предлог-закон за изменување и дополнување на Законот за производство и промет на вооружување и воена опрема, како и за предлог-закон за изменување и дополнување на Законот за класифицирани информации.

Владата го отповика Мико, а Лазе Еленовски го прати во Брисел

Скопје, 28 февруари, 2018 - 10:12 (META) 

Владата на вчерашна седница отповикала на неколку конзули меѓу кои најекспониран е Џејсон Мико, долгогодишен колумнист во пропаднатиот весник „Дневник“ и консултант на владата во времето на ВМРО-ДПМНЕ, кој бил плаќан од буџетот.

Претходно тој бил и лобист за ВМРО-ДПМНЕ и консултант. Според документите заведени на Американската агенција за регистрација за странски соработници – ФАРА, ВМРО-ДПМНЕ за 7.500 долари месечно го ангажирала Џејсон Мико да дава консултантски услуги непосредно пред изборите на 5 јули 2006 година, на кои партијата дојде на власт.

Покрај Мико, отповикани се и Ричард Голдман, Томас Танеф, Ендру Димитри Пејкоф, Лоу Влашо и Пуршотам Карамангала Џајарам.

Во рамките на точките за кадровски измени, Владата вчера го именувала Бујар Дарлишта за в.д. директор на Управата за водење на матични книги, а Лазар Еленовски е назначен за  специјален пратеник на Владата на Република Македонија за НАТО интеграции во Брисел.

На предлог на Mинистерството за финансии Владата го усвоила Предлог – законот за пријавување и евиденција на обврски кои ги имаат буџетските институции. Имено, досега не постоел унифициран механизам на евиденција и следење на обврските на субјектите кои располагаат со јавни средства. Новиот предлог – закон предвидува преку електронски систем да се евидентираат преземени, а неисполнети обврски на институциите, како и неплатените обврски.

Законот ги опфаќа органите на државната власт, единиците на локалната самоуправа, установите и институциите кои вршат дејности од областа на културата, образованието, здравството, детската, социјалната заштита, како и во други дејности од јавен интерес.

Новиот закон за возила предвидува еколошки налепници и посебни таблици за таксистите

Скопје, 15 јануари, 2018 - 14:34 (META) 

Министерство за економија е во процес на подготовка на предлог-закон за изменување и дополнување на Законот за возила. Со предлог-законот се воведуваат посебни таблици за такси возилата и се воведуваат еколошки налепници за возилата.

„Предлог-законот има за цел да ги уреди постапките за остварување на заштитата на правата и правните интереси на физичките лица, правните лица, како и заштитата на јавниот интерес по кои се должни да постапуваат министерствата, органите на државната управа, правните лица и физичките лица на кои со овој закон им е доверено да вршат јавни овластувања“, се вели во објаснувањето за овој предлог-закон на ЕНЕР (Единствен национален електронски регистар на прописи на Република Македонија).

Мислењата, забелешките и сугестиите од засегнатите страни може да се достават до Министерство за економија до 28 февруари.

Законот за АВМУ ќе оди на разгледување во Европската Комисија, па потоа во Влада

Скопје, 27 декември, 2017 - 12:04 (META) 

Последната верзија на Предлог-Законот за изменување и дополнување на Законот за аудио и аудиовизуелни медиумски услуги (Предлог-закон за АВМУ), која Министерството за информатичко општество и администрација (МИОА) вчера ја објави, пред да влезе во владина процедура, ќе оди на разгледување во Европската Kомисија (ЕК) пред да се најде на дневен ред на владина седница, соопшти денеска портпаролот на Владата, Миле Бошњаковски.

– Се очекува да се запазат предвидените законски рокови, и законот да влезе во Собранието без задоцнување – рече Бошњаковски.

Доколку ЕК даде сугестии за измени, МИОА би требало да ги вметне во текстот на предлог-законот пред да го достави до Владата за усвојување, а оттаму ќе биде поднесен во Собранието.

Предлог-законот е подготвен од МИОА и претставници на медиумската сфера. Како што објаснија од Министерството, во него се вклучени некои од предлозите добиени преку Единствениот национален електронски регистер (ЕНЕР), каде претходната нацрт верзија беше објавена на 4 ноември годинава и заинтересираните во текот на 26 денови даваа свои коментари и предлози. Процесот започна на 14 јули годинава, со првата јавна дебата. Втората беше одржана на 20 ноември.

Според МИОА, целта на предлог-законот е департизација и професионализација на јавниот радиодифузен сервис, односно Македонската радиотелевизија (МРТ), и регулаторното тело – Агенцијата за аудио и аудиовизуелни медиумски услуги (ААВМУ).

foom-logo-disklejmerТекстот е изработен во рамки на проектот „Опсерваторија на медиумските реформи“, што го спроведуваат Фондацијата за интернет и општество „Метаморфозис“, „Агора“ Центар за промовирање на граѓански вредности и Платформата за истражувачко новинарство и анализи (ПИНА), со финансиска поддршка на „Фондацијата Отворено општество – Македонија“.
Содржината на текстот е единствена одговорност на авторите и на ниту еден начин не може да се смета дека ги одразува гледиштата на „Фондацијата Отворено општество – Македонија“.

Во Собрание комисии ќе расправаат за неколку закони

Скопје, 21 декември, 2017 - 9:53 (META) 

Вкупно четири комисии во Собранието денеска ќе расправаат за повеќе предлог-закони, меѓу кои и законот за урбано зеленило, предложен своевремено, меѓу другите пратеници, и од Петре Шилегов, кој сега е градски татко на Скопје.

Ќе се дискутира и за Годишниот извештај на Агенцијата за супервизија на капитално финансирано пензиско осигурување во 2016 година, како и за Предлог-закон за изменување и дополнување на Законот за задолжително капитално финансирано пензиско осигурување и за Предлог – закон за изменување на Законот за работните односи, поднесен од 11.868 избирачи, кој се однесува на продолжување на породилното отсуство.

Ќе се дискутира и за предлог-закон за изменување на Законот за електронските комуникации, како и за предлог-законот за култура и тој за културното наследство.