Судијата на претходна постапка кој треба да одлучи по барањето на Специјалното јавно обвинителство (СЈО) за мерките на претпазливост на четворица од осомничените во случајот „Тврдина“ до вчера бил на боледување, откако во средата минатата недела, му се слоши за време на сослушувањето на Гордана Јанкулоска.
Од Основниот суд Скопје 1 за „Мета“, не можеа да потврдат дали судијата денеска се вратил на работа. Тој треба да одлучи кога ќе продолжи со сослушувањето, а од судот велат дека тоа најрано може да се случи кон крајот на оваа работна недела, односно в четврток или в петок.
– Судијата на претходна постапка кој го води предметот користи денови од боледување. Кога ќе испрати покани до странките и кога ќе продолжи постапката, одлучува судијата – ни рекоа од Основниот суд Скопје 1.
Сослушувањето на осомничните во случајот „Тврдина“ почна во средата минатата недела, но по околу четири часа тоа беше прекинато бидејќи судијата не се чувствуваше добро, а интервенираше и екипа на итната медицинска помош.
Поранешната министерка за внатрешни работи, Гордана Јанкулоска, која е една од осомничените во случајот, по излегувањето од судот изјави дека не се чуствува виновна, а за истрагите на Специјалното јавно обвинителство искоментира дека се дел од политичката агенда на СЈО и дека очекува во наредниот период да има уште истраги.
