Малите можности за успех, непрофесионалноста на голем дел на образовниот кадар, неспособноста на образовниот систем да ги натера младите да сакаат да учат, се само некои од причините поради кои студентката Албана Курти одлучила да студира во странство и никогаш да не се врати во земјава, пишува Порталб.мк.
Повеќе од 5.700 млади луѓе од Северна Македонија по завршувањето на средното училиште, ја напуштиле земјата за да студираат, се вели во извештајот на една од најавторитетнитеорганизации во светот, УНЕСКО или Организацијата за образование, наука и култура на Обединетите Нации.
Студентката Албана Курти студира во Соединетите Американски Држави (САД), на Универзитетот во Минесота. Курти ја напуштила државаат уште по средно училиште и првично студирала во Германија.
„Има четири години откако ја напуштив државата, се преселив од Македонија за да го завршам средното училиште. Имав 16 години и решив да ги завршам последните две години средно училиште во Германија, со надеж дека ќе ми се отворат повеќе можности за да студирам во САД “, рече Курти во интервју за Порталб.мк.
Албана малите шанси за успех во земјава ги поврзува со непрофесионалноста на голем дел од работниците во образованието, како и неспособноста на образовниот систем да ги натера младите да сакаат да учат.
„Учев и во јавно и во приватно училиште и забележав дека многу малку наставници навистина ја сакаат својата работа и имаат тенденција да наоѓаат начини да ги учат учениците. Во образование каде што многу наставници не знаат како да го пренесат своето знаење, каде помладите генерации не добиваат приоритет во образованието, тешко е да се успее. Образованието во Македонија за мене е синоним за депресија, пасивност и бесмисленост“, рече Албана Курти, објаснувајќи што не функционира во образованието во РСМ.
Таа додаде дека за време на 16-те години кога учела во државата, „никој не ме научи како да учам, кои се методите на учење што ми одговараат, како да го сакам процесот на учење. Ги научив во Германија, веднаш откако заминав од Македонија “.
Курти не планира да се врати во Северна Македонија по завршувањето на студиите во САД. Таа вели дека работела напорно за да стигне таму каде што е.
„Апсолутно нема да се вратам. Дадов многу напор да стигнам тука каде што сум денес, Македонија не ми даде причина да ги вложам своите напори таму. Мојот квалитет на живот бесконечно се подобруваше во последните 4 години, така што, доброволно, никогаш не би се вратила, за жал “, рече Курти.
Северна Македонија инвестира, другите земји „имаат ќар“
Северна Македонија, преку даноци на граѓаните секоја година троши милијарди денари за учениците во основно, средно образование, но и на факултетите, за спроведување на образовниот процес, а од кадрите во кои вложила, очекува во иднина да се вклучат во државниот систем и да придонесат за земјата.
Меѓутоа, дел од нив, веднаш по завршување на средното образование, заради нивната желба – од отворање перспективи, преку разни државни стипендии, на различни факултети, но и со приватни средства, заминуваат од државата за да студираат и потоа да се вработат во странство. Ова на државата ѝ нанесува финансиски трошоци, бидејќи подготвила кадар којшто ќе го користи друга држава, без да инвестира нешто во нив. Студенти од нашата држава студираат во многу земји низ светот, претежно во Турција, Бугарија и Словенија.
Според извештајот на УНЕСКО, студентите коишто заминуваат, не сакаат да се вратат во својата татковина и тоа е на штета на државата, бидејќи државата платила за овие студенти, наставници и професори да ги учат, им обезбедила книги, помагала за учење, греење, обука и сè што е потребно за образовната средина, додека државата каде што тие одат да студираат, ги прима како обучен персонал до одреден степен, кој е способен по завршување на образованието да работи за државата која не инвестирала во нив.
Кон неквалитетно образование придонесува и тоа што студентите без учење купуваат теми за диплома и магистерски студии – на овој начин тие утре имаат еквивалентни дипломи со кадрите кои го завршиле образованието со знаење. Според нашата анализа, над 13.413 објави за купопродажба на магистерски и дипломски тези во моментов се активни на една од страниците што се занимаваат со трговија во Северна Македонија, цените варираат во зависност од побарувачката, и тоа до 500 евра, а ако имате среќа, магистер на наука можете да станете за само 150 евра.
Државата спие во однос на овој феномен. Ниту едно од овие илјадници соопштенија не го привлече вниманието на инспекторите за образование во земјата. Ова не е регулирано со позитивните закони во земјата, додека експертите од граѓанското општество и образованието предупредуваат дека ваквата состојба може да доведе до тотална деградација на образованието во земјата.
