С. Македонија е ценет сојузник на НАТО. Вие многу придонесувате за безбедноста, преку нашите мировни мисии со КФОР на Косово. РСМ силно ја осуди руската војна против Украина, нудите и воена и финансиска помош за Украина. НАТО може да се потпре на РСМ и обратно.
Ова денеска го истакна генералниот секретар на НАТО Јенс Столтенберг, на заедничката прес-конференција која ја одржа заедно со премиерот Димитар Ковачевски.
„Алијансата ви гарантира безбедност. Покриени сте од борбените авиони на НАТО. Безбедноста на Западен Балкан е од суштинско значење за НАТО. Во БИХ има тензии, во Косово имаше инциденти со сериозно насилство, што вклучуваше и напад на припадници на КФОР и за тоа мора да се одговара. Гледам и авторитарни држави што сакаат да ги поткопаат нашата слобода и начиин на живот, вклучително и тука на Западен Балкан кои сеат поделби, шират дезинформации и ја поткопуваат демократијата. Нашиот одговор мора да биде да се работи уште поблиску, заедно во НАТО преку нашето воено присуство и нашата соработка со сојузниците и партнерите“, рече Столтенберг.
На новинарско прашање, дали е можна дестабилизиција на Балканот, односно дека Русија има таков план, Столтенберг кажа дека засега не гледа директно закана од Русија.
„Ние не гледаме некоја директна воена закана што би дошола од Русија против кој било сојузник на НАТО или регионот Но, остануваме претпазливи и гледаме што прави Русија. Ќе останеме обединети. Подготвени сме брзо да се засилиме и да направиме што треба за да го одбраниме секој сојузник. Ја засилуваме пораката до Русија треба да се воздржи од агресивните дејства против соседите. И секако да ја прекинат својата агресија против Украина. Треба да го почитуваат меѓународното право“, одговори генералниот секретар.
И премиерот Ковачевски, пак, кажа дека согласно информациите кои ги разменува со земјите во НАТО, е дека нема закана за безбедноста и стабилноста на Македонија.
„Се бориме против руското влијание во регионот. Постои руско влијание, но не е ни на приближно ниво на она што го поседуваат нашите институции и земјите членки на НАТО, за да се во можност да направат дестабилизирање на нашата држава“, рече тој.
Премиерот кажа дека со Столтенберг разговарале за евроатлантската интеграција на земјата и за светската безбедност и мир.
„Да се биде дел од НАТО значи безбедност и сигурност на земјата и граѓаните. Како една од помладите членки се посветивме сериозно и ја постигнавме најбрзата воена интеграција. Продолжуваме да дејствуваме како фактор на стабилност во регионот. Таа е важна повеќе од кога било досега, затоа наш приоритет е евроинтеграцијата. Не смееме да имаме пречки на тој пат“, кажа тој.
