Седницата на Советот на јавни обвинители, за избор на тимот на специјалната обвинителка Катица Јанева, и покрај неофицијалните најави дека ќе се одржи утре или в среда, сепак е одложена за наредната седмица.
Ова за весникот „Утрински“, го потврдил претседателот на Советот на јавни обвинители, Петар Аневски, кој ги навел и причините за одлагањето на седницата.
„Побаравме од специјалната обвинителка да ни достави списи со мислења околу предложените кандидати, како и општ работен, перосонален и финансов план, во согласност со членот 13, став 2 од Законот“, изјавил за „Утрински“, Аневски.
Јанева, како кадидати за својот тим обвинители, кои ќе ѝ помагаат во расчистувањето на наводите што произлегуваат од содржината на прислушуваните разговори што ги објави СДСМ, ги предложи обвинителите Артан Ајран, Бурим Рустеми, Гаврил Бубевски, Дарко Јакимовски, Елизабета Јосифовска, Лејла Кадриу, Ленче Ристовска, Лиле Стефанова, Љубомир Лапе, Марија Ѓорѓева, Снежана Бундалевска, Стевчо Дончев, Трајче Пеливанов и Фатмир Фетаи.
Најголемо внимание меѓу нив предизвика обвинителката Лиле Стефанова, која е единствената што доаѓа од Обвинителството за гонење организиран криминал и корупција и досега работела на повеќе предмети кои го привлекоа вниманието на јавноста, меѓу кои случаите „Маѓар телеком“, „Шпион“, „Ликвидација“, „Фаланга 2“ и тој на претседателот на Советот на Општина Центар, Мирослав Шиповиќ.
