Петре Шилегов, портпарол на СДСМ, денеска на прес-конференција кажа дека Македонија се наоѓа во најголемата криза само за Никола Груевски да не оди во затвор. Шилегов вели дека со отворањето на предметот „ТНТ“, СЈО покажало зошто Иванов морал да брза со аболицијата.
– Одговорноста за сите случувања во Македонија е на Никола Груевски, Ѓорге Иванов и на Трајко Вељаноски. Денеска стана јасно зошто Груевски и ВМРО-ДПМНЕ не сакаат фер и демократски избори, бегаат од прочистен избирачки список, реформи во медиумите и од одвојување на партијата од државата – рече Шилегов.
Одговарајќи на новинарско прашање дали СДСМ ќе одговори на барањето за помош што денеска го упати Иванов за наоѓање начин да се повлече аболицијата, Шилегов рече дека е најдобро Иванов да исчезне од политичката сцена во Македонија и дека тој е неспособен, а со одлуката што ја донел само ѝ наштетил на државата.
