Истражителите на украинската безбедносна служба спречиле руски заговор за атентат на претседателот на Украина Володимир Зеленски и други членови на највисокото воено и политичко раководство на земјата.
Приведени се двајца полковници на украинската служба кои на Русите им доставувале доверливи информации, пренесува Укринформ.
„Плановите требаше да бидат имплементирани од агентска мрежа која беше откриена од Службата за безбедност на Украина (СБУ) со помош на раководството на Одделот за државна заштита. Мрежата, чии активности беа надгледувани од Федералната служба за безбедност на Руската Федерација (ФСБ) од Москва, вклучи двајца полковници на Одделот за државна заштита кои „протекоа“ тајни информации до Руската Федерација“, се вели во соопштението на СБУ.
Според СБУ, планот бил да регрутираат агент кој ќе ја следи метата и ќе пренесува информации на ФСБ, а потоа требало да извршат напад со дронови.
Шефот на СБУ, Васил Малјук, рече дека нападот требало да биде подарок на Путин пред инаугурацијата. Сепак, Маљук потврдува дека операцијата била неуспешна.
„Но, не смееме да заборавиме – непријателот е силен и искусен, не може да се потцени“, додава тој.
Двајцата украински функционери се во притвор поради сомнение за предавство и за подготовка на терористички акт.
