Стотици пожарникари во текот на ноќта работеа да го локализираат шумскиот пожар на периферијата на Атина, принудувајќи повеќе лица да се евакуираат бидејќи властите предупредија дека ризикот од нови пожари е голем низ целата земја, пишува Екатимерини. Дваесет луѓе загинаа откако пожарите избувнаа во северна Грција во саботата и брзо се проширија, разгорени од силните ветрови. Пожарот во близина на селото Фили во подножјето на планината Парнита, на околу 25 километри северно од Атина, се прошири кон градот Мениди, каде што околу 150 луѓе мораа да бидат евакуирани од три старечки домови, изјави локален претставник.
„Го држевме пожарот подалеку од домовите. За жал, ветрот воопшто не помага“, изјави Статис Топалидис, заменик градоначалник на Мениди, за државната телевизија ЕРТ во средата.
Тој рече дека старите лица биле евакуирани со автобуси во хотели или други установи за нега. Пожарот зафати куќи и автомобили во Фили и ги принуди жителите да бегаат пеш. Волонтери товареле и овци во автомобилите за да ги спасат од пламените јазици.
Спасувачите вчера открија 18 изгорени тела, за кои се верува дека се мигранти, во рурална област во близина на шумата Дадија во северниот регион Еврос, која граничи со Турција, популарна рута за луѓето од Блискиот Исток и Азија кои бараат влез во Европската унија. Во грчкиот пристанишен град Александрополис во близина, десетици болнички пациенти, некои на носилки, други со IV капки закачени на рацете, беа евакуирани на траект. Сателитска снимка емитувана на државната телевизија покажа дека чадот од пожарите на Еврос се развлече низ целата земја кон островите во Јонското Море на северозапад, недалеку од Италија.
Летните шумски пожари се вообичаени во Грција, но оваа година тие се влошени поради невообичаено топло, суво и ветровито време, кое научниците го поврзуваат со климатските промени. Во јули, десетици илјади странски туристи беа евакуирани од островот Родос, каде гореше една недела, уништувајќи хотели и одморалишта.
