Партијата на Груевски спротивно на законот се меша во работата на државната установа МАРНЕT, се вели во реакцијата на СДСМ на соопштението на ВМРО-ДПМНЕ по прес-конференцијата на дополнителниот заменик-министер во Министерството за информатичко општество, Александар Кирацовски.
„ВМРО-ДПМНЕ самата во реакцијата се расфрлува со домени за регистрација во МАРНЕТ. Како од ВМРО-ДПМНЕ знаат кој е украден назив за регистрација на интернет-страница?! Груевски и во последните денови од својот мандат се обидува да злоупотребува институции за партиски цели. Ќе се дознае како од МАРНЕТ дозволиле кражба на доменот купен од СДСМ, кои други физички и правни лица ги оштетила јавната установа и за кого работат, за граѓаните или за власта“, се вели во реакцијата на СДСМ.
Кирацовски на прес-конференција ги обвини МАРНЕТ дека неполни 24 часа откако СДСМ го купила називот „zbogumnikola.mk“, истиот го продале на извесен Новаков, индивидуален земјоделец од населба Речани, Велес, кој од МАРНЕТ е заведен како корисник.
На ова реагираа од владејачката партија ВМРО-ДПМНЕ и ги обвинија претставниците на СДСМ дека бараат оставка од претседателот на Владата бидејќи не знаат да регистрираат веб-адреса, а сакаат да водат држава.