Во раните утрински часови Русија изврши воздушен напад врз Кијив и тоа само неколку часа пред почетокот на самитот на НАТО во Вилнус, Литванија на кој алијансата ќе се фокусира на справувањето со безбедносните закани од Москва, пренесува Гардијан.
„Непријателот го нападна Кијив низ воздух по втор пат овој месец“, рече Серхи Попко, шеф на воената администрација на Кијив, во објава на апликацијата Телеграм.
Украинските системи за воздушна одбрана ги собориле сите беспилотни летала од иранско производство што Русија ги лансирала, пред да стигнат до нивните цели, тврди Попко. Засега нема информации за штети или жртви.
Според украинските воздухопловни сили, предупредувањата за воздушен напад во украинскиот главен град биле активни повеќе од еден час, а во делови од истокот на Украина и подолго.
Ова се случува пред почетокот на самитот на НАТО во Литванија кој се очекува да го обликува правецот на војната во Украина и иднината на западната алијанса.
Сојузниците се очекува да ѝ покажат на Русија дека се подготвени да ја поддржуваат Украина и на подолг рок.
Се претпоставува дека одредени сојузници ќе му ветат на Кијив нови безбедносни гаранции дизајнирани да ја одвратат идната руска агресија. Тие ќе разговараат и за обезбедување повеќе оружје и муниција, пренесува Би-би-си.