Фондацијата за доделување на Нобеловата награда ја повлече одлуката да ги покани Русија, Белорусија и Иран на овогодинешната церемонија на доделување награди во Стокхолм. Поканата наиде на силни критики во јавноста, а од Фондацијата соопштија дека ја препознале силната реакција во Шведска.
Русија и нејзиниот сојузник Белорусија не беа поканети и минатата година по руската инвазија на Украина, додека Иран беше изоставен поради досието за човекови права.
И Украина ја критикуваше овогодинешната одлука, по што го поздрави решението за повлекување како „победа на хуманизмот“. Церемонијата на доделување на наградите се одржува во Стокхолм на 10 декември – годишнината од смртта на Алфред Нобел.
Во своето соопштение, Нобеловата фондација ја бранеше својата претходна одлука, велејќи дека „важно е и правилно да се допре што е можно пошироко со вредностите и пораките за кои се залага Нобеловата награда – на пример, преку минатогодишната јасна политичка порака со наградата за мир доделена на борците за човекови права од Русија и Белорусија, како и на Украинците кои работат со документирање на руските воени злосторства“, но, призна дека реакцијата на јавноста ја засенила оваа порака.
„Избравме да го повториме минатогодишниот исклучок од редовната практика – односно да не ги поканиме амбасадорите на Русија, Белорусија и Иран на церемонијата на доделување на Нобеловата награда во Стокхолм. Како и досега, сите амбасадори ќе бидат поканети на церемонијата во Осло“, соопшти фондацијата.
