Новоизбраниот грчки лидер Алексис Ципрас во својот победнички говор синоќа направи гаф, споменувајќи ја приказната за пророчицата Касандра од грчката митологија, пишува денеска британскиот весник „Гардијан“.
– Пријатели, новата грчка влада ќе им докаже на сите „касандри“ во светот дека грешат. Нема да има заемни деструктивни судири… Имаме одлична можност за нов почеток – рече Ципрас.
Главниот проблем е во тоа што пророчицата Касандра секогаш точно ја предвидувала иднината.
Лидерот на СИРИЗА, споменувајќи ја Касандра, пишува „Гардијан“, сакал да каже дека политичарите и главните банкари направиле голема грешка кога предвиделе дека победата на неговата партија на изборите ќе значи крај на Грција, на еврото и на светската економска политика каква што сега ја познаваме.
Според грчката митологија, богот Аполон, обидувајќи се да ја заведе убавата Касандра, ѝ подарил моќ да ја предвидува иднината, но откако таа го одбила, тој ја проколнал никој да не ѝ верува на предвидувањата (а тие да се остваруваат). Пророчицата го предвидела и падот на Троја, но ниту тројанскиот крал не ѝ поверувал на предвидувањата, кои подоцна се покажале како вистинити.