Министерот за економија Крешник Бектеши, директорката на Бирото за метрологија, Мерита Мустафаи и в.д. директорката на Државниот пазарен инспекторат, Анета Симеска Димоска денеска ја промовираа новата лабораторија за испитување на квалитетот на горивата во рамки на Бирото за метрологија, соопшти Министерството за економија.
Инаку, ова не е првата лабораторија за контрола на квалитетот на горивата и на мазутот, оти таква веќе функционира во рамките на Природно-математичкиот факултет во Скопје, при компанијата „Макпетрол“, а пред речиси три години истиот министер промовираше и мобилна лабораторија. Горивата во општа употреба се нафтени деривати, исто како и мазутот, кој е тврд остаток од нафтената дестилација.
Како што истакна министерот за економија Крешник Бектеши денеска, „оваа нова лабораторија е опремена со автоматизирана опрема со седум мерни инструменти и екипирана е со стручен кадар обучен за тестирање на повеќе од 10 параметри на мазутот. Опремувањето чини 24 милиони денари, а резултатите од анализите ќе се добиваат во кус временски период и во промет ќе се пуштаат само горива со проверен квалитет“.
