Државната компанија Електрани на Северна Македонија (ЕСМ) од утре го презема управувањето со топлинска енергија во Скопје. Министерот за економија Крешник Бектеши изјави дека денеска попладне ЕСМ ќе го достави на владина седница предлог-договорот за соработка со БЕГ и треба да биде склучен договорот, за од утре државната компанија да го преземе управувањето со БЕГ, но и со АД Скопје Север.
„Од утре, ЕСМ ќе управува со БЕГ снабдување, БЕГ дистрибуција и БЕГ производство со цел граѓаните на град Скопје во континуитет и сигурно да бидат снабдувани со топлинска енергија до крајот на грејната сезона“, изјави министерот Бектеши.
Тој повтори дека граѓаните ќе имаат парно греење до 1 часот по полноќ, но и дека нема да има намалување на температурата на загревање во внатрешните простории на потрошувачите. Воедно, владата по потреба ќе вбризгува дополнителни финансиски средства за да се обезбеди природен гас како енергент од којшто се произведува топлинската енергија.
Потрошувачите од јануари добиваат за 14 отсто повисоки сметки за топлинска енергија на месечно ниво, откако цените на природниот гас во изминативе месеци достигнаа енормно зголемување на европските берзи. БЕГ преку соопштение се огласи дека од 15 јануари нема да може да врши снабдување со топлинска енергија до корисниците, поради тоа што немаат можност да ги покријат финансиските средства за набавка на гас без државна помош.
Владата на РСМ се одлучи по ова да усвои Одлука за постоење на кризна состојба во снабдувањето со топлинска енергија, но и да потпише договор со ТЕ-ТО за набавка на дополнителни количини електрична енергија од когенеративната електрана во Скопје, со што ќе се обезбеди и топлинска енергија за корисниците на парното греење.
Инаку, АД ЕСМ управува со години наназад со парното греење што го обезбедува на територијата на скопската општина Гази Баба, а на која се приклучени над 3.800 корисници. До крајот на грејната сезона, државната компанија ќе управува и со дистрибутивната мрежа на БЕГ на која се приклучени над 55.000 потрошувачи, како и на АД Скопје Север која има околу 500 корисници.
