Антикорупциската комисија на денешната седница поднесе иницијатива до Обвинителството, Владата, Комисијата за заштита на конкуренцијата, Регулаторната комисија за енергетика, финансиската полиција и до УЈП поради сериозни сомнежи за монополско и непријателско здружување на пазарот на мазут во земјава, со цел предизвикување пораст на неговата цена и пораст на цената на електричната енергија на штета на домашното стопанство, граѓаните и јавниот интерес на државата.
Комисијата, по речиси едногодишна работа на случајот поврзан со АД ЕСМ Скопје, утврдило состојби од кои произлегуваат сомнежи за несовесно работење, искористување и злоупотреба на службената положба и овластувања од страна на службени лица од Министерството за економија, поранешен директор на ЕСМ и членови на комисија за спроведување набавка на мазут за потребите на ЕСМ / АД ТЕЦ Неготино.
Имено, АД ЕСМ Скопје за потребите на АД ТЕЦ Неготино, со цел рестартирање на овој субјект за производство на електрична енергија, требало да набави мазут за 212 милиони евра. Набавката требало да ја изврши фирмата „РКМ ДОО Скопје“, а требало да бидат набавени околу 195 илјади тони мазут.
Во текот на разговорите со надлежните лица, а и увидот во документите, било утврдено дека во тендерската документација на АД ЕСМ Скопје не било барано економските оператори да го докажат техничкиот капацитет за испорака на мазутот, a пробиени биле и финансиските планови за јавни набавки на ЕСМ.
На првиот договор за набавка на мазут со РКМ, според антикорупционерите, склучен бил анекс без да се утврди потребната количина и без да се утврдат ценовните и техничките услови на испорака, со што се овозможило за истата количина да се испорача мазут по повисока цена.
На вториот договор за набавка на мазут со РКМ, пак, кој иако бил истечен и без правна сила, склучен бил анекс со цел да се исплатат дополнителни средства, без да се наведе испорака на дополнителна количина на мазут.
Според сметководствената документација на АД ТЕЦ Неготино испорачаниот мазут од двата договори бил со помала количина за околу 18.000 тони, а РКМ набавил мазут во помала количина од онаа што била наведена како испорачана.
Понатаму, оваа фирма прикажала помалку приход во билансите во споредба со договорите за испорака на мазут.
„Македонија нема акцизен склад за увоз на мазут и затоа испораката е вршена преку камионски и авто цистерни. АД ТЕЦ Неготино не го следел исполнувањето на договорите за испорака на мазут од страна на РКМ затоа што не е потписник на овие договори. Во договорите за испорака на мазут предвидени се минимални казнени пенали за непочитување на договорите за испорака на мазутот“, велат од Државната комисија за спречување на корупцијата.
Според ова, утврдени биле состојби кои укажуваат на сомнежи за трговија по пат на инсајдерски информации на енергетскиот пазар, за даночно затајување и ерозија на т.н. солидарен данок на добивка од страна на РКМ ДОО Скопје.
Сомнежите укажуваат и на монополско и непријателско здружување на пазарот на мазут во РСМ, со цел предизвикување пораст на неговата цена, а со тоа и растројство на пазарот на мазут во земјава и пораст на цената на електричната енергија.
