Денеска е последниот ден од предвиденото четиридневно примирје помеѓу Израел и Хамас, известува Би-би-си. Како што беше предвидено во договорот меѓу двете страни, секој ден од петок досега, Хамас ослободува дел од заложниците кои ги имаа заробено за време на нивниот напад врз Израел на 7 октомври, додека Израел ослободува палестински затвореници, најмногу жени и малолетници.
Според договорот меѓу Израел и Хамас, примирјето може да биде продолжено доколку Хамас се подготвени да ослободат повеќе заложници. Хамас велат дека тие се подготвени за ваков чекор. Се чека одговор од израелската страна.
Вчера беа ослободени 17 заложници и 39 палестински затвореници. Илјадници луѓе се собраа околу израелската воена база Хацерим за да ги пречекаат ослободените заложници.
Синот на 84-годишната Елма Аврахам, една од ослободените заложнички, вели дека мајка му е во критична здравствена состојба. Според него, негрижата додека таа била во подземните тунели во Хамас драстично ѝ ја влошила здравствената состојба.
Еден од ослободените палестински затвореници всушност не бил ослободен од затвор, туку бил ослободен од домашен притвор. Абдулрахман Ал-Загал од август е во болница во Ерусалим откако бил застрелан во главата од израелски сили во август. Израелските сили тврдат дека 14-годишното момче се обидувало да фрли бомба во населено место, а вујко му тврди дека тој само излегол да купи леб.
Дополнително, раселени жители на Газа кои се моментално во јужниот град Кан Јунис сметаат дека не станува збор за „целосно примирје“ бидејќи им е забрането да се вратат во своите домови во северот на појасот, известува Гардијан.
Досега и двете страни ја имаат обвинето другата за прекршување на примирјето. Според Израел, Хамас лансирале ракети кон Израел само 15 минути по почетокот на примирјето. Според Хамас, израелските сили убиле двајца Палестинци кои се обидувале да стигнат до северниот дел на Газа.
