Министерот за надворешни работи на Република Македонија, Никола Попоски, денеска се сретна со помошничката на државниот секретар на Соединетите Американски Држави за европски и за евроазиски прашања, Викторија Нуланд, која престојува во работна посета на нашата земја.
Попоски и Нуланд, како што се наведува во соопштението од МНР, изразиле задоволство од досегашниот развој на односите меѓу двете пријателски држави, втемелени на Декларацијата за стратегиско партнерство и соработка, како и заемно истакнатиот интерес за нивно натамошно унапредување во сите области од заемен интерес.
На средбата, исто така, се разговарало за стратегиската определба на Република Македонија за што е можно поскоро зачленување во НАТО и за почнување на преговорите за пристапување во Европската унија, за што Соединетите Држави даваат недвосмислена поддршка.
– Во светло на наредниот самит на Алијансата во Варшава идната година, исполнетоста на критериумите за членство и за учеството на припадниците на АРМ во рамките на повеќе мировни мисии, ни даваат полно право да инсистираме на надминување на сите пречки за нашето зачленување. Република Македонија е посветена на почитување на демократските принципи и на меѓународното право. Истото го очекуваме и од сите наши партнери – рече Попоски.
Попоски и Нуланд размениле мислења и за актуелните внатрешно-политички состојби и предизвици во Република Македонија.
– Поскоро надминување на политичката криза е интерес на македонските граѓани и на економијата – рече Попоски.
