Во просториите на понтификалниот универзитет Урбаниана во Рим (Via Urbano VIII, 16), синоќа, во рамките на манифестацијата „Македонија во чест на Св. Кирил“ и по повод одбележувањето на Денот на светите браќа, сесловенските просветители Кирил и Методиј, беше отворена изложбата „Св. Климент Охридски и неговите претстави во ликовната уметност“.
Со оваа изложба, во организација на Н.У. „Завод и Музеј“ од Охрид, се одбележуваат два исклучително значајни јубилеи: 1.130-годишнината од доаѓањето на Свети Климент во Охрид и 1.100. годишнината од неговото упокојување.
На изложбата се поставени фреско-копии со ликот на Свети Климент од црквите во Македонија, дел од Косово и Србија и фотографии од неговите мошти.
Вкупно се изложени 38 дела, сопственост на „Завод и музеј“ од Охрид, од „Музејот на Македонија“ и икони од колекцијата на Галеријата во Охрид.
– Најстарата икона која воопшто е најстарата икона со претстава на ликот со Свети Климент Охридски е од 13-тиот век, како впрочем што е и дрвената резба. Тоа се двете најстари икони со претстави на Свети Климент. И една од фреско копиите е исто така една од најстарите – рече Милчо Георгиевски, историчар на уметност и кустос во охридскиот „Завод и Mузеј“.
Георгиевски додаде дека пред публиката се презентирани 18 фреско-копии со ликот на Свети Климент Охридски од црквите во Македонија, Србија и Косово, 5 икони од XIII-XIX век, како и 15 фотографии од цркви каде што се чуваат, или во одредени историски периоди престојувале неговите мошти.