Унгарија никогаш повеќе нема да дозволи бегалци да влезат на нејзина територија, рече денеска унгарскиот премиер Виктор Орбан.
– Имигрантската рута може да оди каде сака, но сигурно нема да минува низ Унгарија – рече Орбан во неделното интервју за радио „Кошут“.
Унгарија беше дел од таканаречената балканска рута додека Орбан не ја затвори границата прво кон Србија, а потоа и кон Хрватска.
Орбан, кој покажа отворено непријателство кон имигрантите, особено кон муслиманите, ја даде изјавата како одговор на нагаѓањето дека бегалците од балканската рута би можеле да тргнат кон Романија, а потоа кон Унгарија.
