Опозициските партии во Турција се должни да формираат влада бидејќи тие заедно добија најголем број гласови на парламентарните избори на 7 јуни, изјави лидерот на главната опозициска Републиканска народна партија, Кемал Килиџароглу.
Според него, „неприфатливо“ е што претседателот Реџеп Таип Ердоган е главен политички фактор во коалициските разговори.
Килиџароглу истакна дека Ердоган мора да остане во рамките на границите на шеф на државата, кои се утврдени со Уставот.
Претходно Ердоган рече дека предвремените избори ќе бидат неизбежни ако владејачката Партија на правдата и развојот (АКП) и опозицијата не успеајат да формираат нова влада во рамки на уставниот рок од 45 дена.
Прокурдската Народна демократска партија во Турција (ХДП), која првпат влегува во парламентот, рече дека е отворена за сите опции за формирање коалициска влада, освен со владејачката АКП.
