На програмата на меѓународниот музичко-сценски фестивал „Охридско лето“, вечерва, од 21 часот, во црквата „Св. Софија“, целовечерен концерт ќе има камерниот оркестар на „Музичка младина на Македонија“, под диригентска палка на Елена Митревска.
„Музичка младина на Македонија“ е национална невладина организација, која работи со и за млади луѓе, развивајќи ја нивната креативност и поддржувајќи го нивното почетно јавно претставување на полето на музичката уметност.
МММ ги обединува младите без оглед на нивната политичка, религиозна, јазична или национална припадност, придонесувајќи младите генерации да имаат космополитски и хуманистички пристап во својата индивидуална и глобална креативност и развој.
Елена Митревска дипломирала на Факултетот за музичка уметност на одделот за музичка теорија и педагогија – насока хорско диригирање. Образованието го продолжила на Универзитетот за музика и изведувачки уметности во Виена, на одделите по хорско диригирање и оркестарско диригирање.
Митревска на студиите во Виена активно работи како диригент на неколку хорови, а го основа и ансамблот „Глезум“. Добитник е на повеќе награди и признанија, меѓу кои и престижната награда „Ервин Ортнер“, која се доделува за значајни достигнувања на полето на хорското диригирање во Австрија.
Од 2012 година работи како асистент на хорот „Арнолд Шенберг“.
