Филмот „Човекот-птица“ (Birdman) на мексиканскиот режисер Алехандро Инариту доби седум номинации за „Златен глобус“, пред филмовите „Момчештво“ (Boyhood) и „Игра на имитација“ (The Imitation game), кои имаат по пет номинации.
Новиот филм на Инариту, меѓу другото, е номиниран и за најдобра комедија, за најдобра главна и споредна улога во комедија (Мајкл Китон и Едвард Нортон), и за најдобра споредна женска улога во комедија (Ема Стоун).
За најдобра комедија, покрај „Човекот-птица“ номинирани се и „Гранд хотел Будимпешта“ (Grand Budapest Hotel), „Во шумата“ (Into the Woods), „Гордост“ (Pride) и „Сент Винсент“ (St. Vincent). Филмовите „Момчештво“ и „Игра на имитации“ се номинирани и во категоријата најдобра драма, покрај „Фокскечер“ (Foxcatcher), „Селма“ и „Теорија за сè“ (The Theory of Everything).
Во конкуренцијата за најдобра драмска изведба номинирани се Стив Карел (Фокскечер), Бенедикт Камбербач (Игра на имитации), Џејк Гиленхал („Ноќен ползач“, Nightcrawler), Дејвид Ојелово (Селма) и Еди Редмејн (Теорија за сè), додека за титулата најдобра актерка во драма ќе се борат Џенифер Анистон („Торта“, Cake), Фелисити Џонс (Теорија за сè), Џулиен Мур („Сè уште Алис“, Still Alice), Росамунд Пајк („Исчезната“, Gone Girl) и Рис Витерспун („Дива“, Wild).
На Мајкл Китон за најдобар актер му конкурираат Ралф Фајнс (Grand Budapest Hotel), Бил Мареј (St. Vincent), Жоакин Феникс („Својствен грев“, Inherent Vice) и Кристофер Волц („Големи очи“, Big Eyes), додека за најдобра женска улога во комедија номинирани се Ејми Адамс („Големи очи“ Big Eyes), Емили Блант („Во шумата“, Into the Woods), Хелен Мирен („Патување од сто стапки“, The Hundred-Foot Journey), Џулиен Мур („Мапи до ѕвездите“ Maps to the Stars) и Кувенжани Волис („Ани“, Annie).
За најдобар странски филм, номинирани се шведскиот филм „Виша сила“ (Force Majeure Turist), израелскиот „Судењето на Вивиен Амсалем Гет“ (Gett: The Trial of Viviane Amsalem Gett), полскиот „Ида“, рускиот „Левијатан“ и естонскиот „Мандарини“ (Mandariinid).
Добитниците на „Златен глобус“ ќе бидат познати на доделувањето на наградите што ќе се одржи на 11 јануари.
