Дополнителниот заменик-министер за земјоделство, шумарство и водостопанство, Љупчо Николовски, денеска одржа прес-конференција на која обвини дека Љубислав Иванов-Ѕинго, сопственикот на телевизијата „Сител“, преку тендери во Министертвото добил половина милион евра за чистење канали за одводнување и за наводнување.
„Овие официјални податоци на Бирото за јавни набавки го потврдуваат токму тоа. Фирмата „Силекс неметали“, во сопственост на „Силекс АД Кратово“, е една од фирмите што склучила договор со Министерството за земјоделство, шумарство и водостопанство за чистење на каналите за одводнување и за наводнување за околу 28 милиони денари или близу половина милион евра. Има и официјални податоци од Агенцијата за финансиска поддршка на земјоделството и на руралниот развој кои потврдуваат дека на фирмата „Силекс неметали“ ѝ биле исплатени околу 23 милиони денари, за чистење на каналите за одводнување и за наводнување за 2014 година. Апсурдно, според официјални податоци на истата агенција, следната 2015 година, за штети од поплави поради неисчистени канали ѝ се исплатени повеќе од 5 милиони евра“, вели Николовски.
Тој објаснува дека во истиот период кога фирмата „Силекс неметали“ го добила тендерот, министер за земјоделство бил токму Михаил Цевтков, кој во исто време е и член на управниот одбор во „Силекс АД Кратово“.
Николовски вели дека не е доволно Цветков да даде оставка, туку ДКСК треба веднаш да покрене постапки, истраги и да бара одговорност.
„Додека земјоделците мака мачеле со поплавите во Македонија, нивните пари се злоупотребувале за зајакнување на медиумскиот мрак што го создаде „фамилијата“ и за црните кампањи против опозицијата. Во министерство раководено од кадри на Ѕинго, милиони се префрлаат во фирми токму на Ѕинго. Системскиот криминал на „фамилијата“ не познава граници. Ова е класичен пример за корупција на медиумите. Затоа Груевски не сака слободни медиуми и бега од слободни, фер и демократски избори“, вели Николовски.
