Министерството за внатрешни работи (МВР) поднесе кривична пријава за злоупотреба на службената должност на кочанскиот градоначалник Љупчо Папазов, затоа што четири пати го именувал истото лице за в.д директор на средното училиште „Гошо Викентиев“, иако знаел дека тоа не го положило испитот за директор во законски утврдениот рок.
По овој потег, реагираше кочанскиот градоначалник, но и политичките партии ВМРО-ДПМНЕ и СДСМ.
Градоначалникот Папазов во реакцијата вели дека именувањето на в.д. директорот на средното училиште во Кочани го извршил по претходно објавен интерен оглас, на кој имало само пријавен еден кандидат.
„Во ноември 2021 година добив писмена отставка од тогашниот директор на СОУ „Гошо Викентиев“, а на почетокот на декември истата година донесов одлука и беше објавен интерен оглас со пропишаните услови за избор на вршител на должноста директор на училиштето. Беше поднесена една пријава од редот на вработените во училиштето и согласно пријавата донесов одлука за назначување на Спирко Златков за в.д директор. Ова е целата вистина во врска со назначувањето на директор и со обидите да се прави притисок врз работата на градоначалникот. Дали ова е обид да се релативизира и сокрие пријавата од в.д директорот уште пред шест месеци во врска со откриени малверзации од страна на вработени лица во училиштето, блиски роднини на поранешен началник и сегашен инспектор во полицијата, за што сѐ уште ништо не е превземено од страна на МВР“, реагира Папазов.
Од неговата матична партија ВМРО-ДПМНЕ денеска реагираа дека кривичната пријава била политички прогон на кочанскиот градоначалник.
„Ова е чист политички прогон за градоначалник од ВМРО-ДПМНЕ. Ги боли градоначалникот на Кочани, Папазов затоа што работи, ги боли ВМРО-ДПМНЕ затоа што направи очигледна разлика“, велат од ВМРО-ДПМНЕ.
Од СДСМ пак реагираат дека ВМРО-ДПМНЕ и Христијан Мицкоски треба да сфатат дека времето на локални шерифи е одамна завршено.
„ДПМНЕ раководена од Христијан Мицкоски а длабоко навлезена во режимската матрица мисли дека нивните градоначалници можат да се однесуваат како локални шерифи како што тоа го правеа во време на режимот, па затоа со сите сили се обидуваат да го заштитат нивниот градоначалник кој е осомничен дека ја злоупотребил службената положба“, стои во соопштението на СДСМ.
Од СДСМ додаваат дека не чуди што оваа партија брани лица осомничени за сторени кривични дела, како што е последниот случај со нивниот градоначалник на општина Кочани.
