Министерството за внатрешни работи (МВР) објави видеоснимка од апсењето на Ф.А. (49), првоосомничен во случајот „Чекан“, кој два месеци се криеше од органите на прогонот.
„Врз основа на претходно добиени оперативни сознанија, изминатиот период МВР направи дополнителни проверки и го лоцираше осомничениот, а беше подготвен и план за негово приведување. Поради сомнежите дека станува збор за опасно лице, беа ангажирани поголем број полициски службеници, кои влегоа во објектот и без поголеми проблеми или ризик по нивните животи или животот на осомничениот, истиот беше обезбеден и спроведен во Истражниот затвор „Скопје“, стои во соопштението на МВР.
При претресот на куќата во која се криел осомничениот, полицијата пронашла 2.115 евра, околу 400 американски долари, 10 швајцарски франци, околу 12.000 денари, еден пиштол, седум куршуми, два мобилни телефони, повеќе СИМ-картички и една актовка со повеќе документи, која била запечатена и допнително ќе се проверува.
МВР, во полициската акција „Чекан“, на почетокот од декември минатата година, поднесе кривични пријави против 19 лица осомничени дека се членови и помагачи на криминална група, предводена од Ф.А., која од 2008 година дејствувала во Гостивар.
Осомничените членови на групата се товарат за злосторничко здружување, лихварство и за перење пари.
