Потпретседателот на СДСМ Мухамед Зекири е именуван за нов секретар на Владата на РСМ на денешната 24.седница, информираа вечерва од владината прес-служба. Зекири доаѓа на местото на Драги Рашковски, којшто си поднесе оставка од оваа функција пред речиси два месеци.

Иако Мухамед Зекири се споменуваше како можен директор на Фондот за здравствено осигурување, сепак на Зеќири сега му припадна функцијата што досега ја извршуваше Драги Рашковски. Во минатиот парламентарен состав, Зекири беше пратеник од редовите на СДСМ.

Инаку, на денешната седница Владата донесе и неколку други кадровски решенија. Осман Шукриу е именуван за директор на Јавната установа Национален парк Пелистер – Битола. Исто така, Еран Куртиш е именуван за в.д. директор на Агенцијата за остварување на правата на заедниците.

Владата донесе одлука Зоран Иванов да се разреши од должноста член на Надзорниот одбор на АД „Медиумска информативна агенција” – Скопје, во државна сопственост. Воедно, Владата даде согласност на одлуката на УО на ПИОМ за изборот на Шаип Зендели за заменик директор на Фондот за пензинско и инвалидско осигурување (ПИОМ).