Темелот на еден од столбовите на железничкиот мост на Црна Река кај Стоби е во многу лоша и очајна состојба. За ова денеска информираше министерот за транспорт и врски Благој Бочварски, кој најави дека ќе биде потребна поголема и потемелна санација на железничкиот мост пред да тргнат возовите на Коридорот 10.
Бочварски вели дека нуркачкиот тим што бил обезбеден од Министерството за внатрешни работи, утврдил лоша состојба на темелите, додавајќи дека ќе ги почекаат анализите од експертите, по што владата и јавното претпријатие за железничка инфраструктура ќе одлучат дали ќе се санира постојниот мост или ќе се гради целосно нов мост. Тој очекува веднаш по експертските анализи да се влезе во постапка на санација.
„Очекувам дека во наредните 60 дена ќе се изврши санација, а доколку има можност, и реализација на комплетно нов мост којшто ќе биде траен, а не да ни се случуваат вакви пукнатини во една од главните транзитни точки на Коридорот 10“, изјави министерот Бочварски.
Додека не се санира мостот, железничкиот превоз на пругата меѓу Велес и Гевгелија е во прекин, а со тоа не сообраќаат ниту транзитните возови на пругата долж Коридорот 10, што уште повеќе ќе ја влоши состојбата со двете железнички претпријатија во земјава.
Од 14 ноември во целосен прекин е товарниот и патничкиот железнички превоз поради напукнат бетонски столб на мост на Црна Река, меѓу селата Кукуричани и Градско.
Железницата во голгота, напукнат мост ги сопре возовите на Коридор 10
Инаку, поради проблеми со истиот мост на Црна Река во 2018 година, во целосен прекин беше железничкиот сообраќај на Коридорот 10. На 2 октомври 2018 година беше сопрено движењето на возовите поради напукнат столб на мостот. Тогаш беше спроведена итна санација на мостот, но железничкиот превоз беше во прекин повеќе од еден месец и беше повторно ставен во функција на почетокот од ноември 2018 година.
