фото: Мета.мк

Министерството за образование и наука ја поздравува одлуката на градоначалникот на општина Градско за разрешување на директорот на основното општинско училиште каде беше утврден случај на врсничко насилство, соопштија оттаму.

„Ја охрабруваме локалната самоуправа да продолжи и да ги интензивира активностите за градење на мирна и хармонична училишна средина во која секое дете ќе може да го достигне својот полн потенцијал. Ова е порака и до сите општини и училишни менаџменти во државата, бидејќи насилното однесување меѓу младите не смее да биде опција“, наведено е во соопштението.

Во МОН осудуваат секакво насилство во и надвор од училиштата и затоа заедно со МВР и општините, училиштата, странските партнери и граѓанските организации, тврдат дека работат на подигнување на свеста кај младата популација за потребата од толерантно однесување.
Двајца деветтодделенци во „Даме Груев“ во Градско, во два наврати, му искинале долен веш на соученик во соблекувалната за физичко образование. Првпат тоа се случило на четврти, а вторпат на 11 ноември, кога ученикот се вратил дома освен со искинат долен веш и со гребнатини на телото. По обелоденувањето на овој случај, градоначалникот ја разреши директорката на училиштето.