Инцидентите и случувањата во Македонија се најдоа на агендата на разговори на грчкиот шеф на дипломатијата, Никос Коѕиас, и високата претставничка за надворешна и безбедносна политика на Европската унија, Федерика Могерини. Коѕиас и Могерини се сретнаа на маргините на редовниот состаник на министри за надворешни работи на НАТО во Анталија.
Од грчкото министерство за надворешни работи информираат дека на средбата Коѕиас и Могерини изразиле заедничка загриженост за последните случувања во Македонија. Двајцата министри разговарале општо за случувањата во Југоисточна Европа, кипарското прашање и за продолжувањето на преговорите за Кипар, ситуацијата во Украина. Станало збор и за идниот совет за надворешни работи и за самитот во јуни. Коѕиас ја информирал Могерини и за исходот од разговорите во Турција.