Предложените измени и дополнувања на осум закони за забрзување на изградбата на автопатите од „Бехтел-Енка“ откако вчера поминаа на прво читање во Собранието на РСМ, денеска експресно се најдоа пред дел од собраниските комисии. Во собраниската Комисија за труд и социјална политика денеска се најдоа на разгледување предложените измени и дополнувања на Законот за работни односи. Веќе утре, во Комисијата за економски прашања ќе пристигнат предложените измени и дополнувања на Законот за минерални суровини, додека комисиската расправа по преостанатите шест закони треба допрва да се закаже.
Од опозициските партии ВМРО-ДПМНЕ и Левица денеска најавија дека ќе поднесат амандмани на предложените законски измени и дополнувања.
Пратеничката Ели Панова од ВМРО-ДПМНЕ на денешната прес-конференција кажа дека пратеници од оваа пратеничка група веќе поднеле два до три амандмани за предложените измени од Законот за работни односи на денешната седница на собраниската Комисија за труд и социјална работа.
Поднесување на амандмани најави и Борислав Крмов од Левица, без притоа да го наведе нивниот број што ќе следи за време на комисиската расправа. Исто така, и пратеникот од ВМРО-НП Љупчо Балковски најави дека ќе поднесе амандмани на сите предлог-закони поврзани со изградбата на коридорите. Балковски побара власта да го објави договорот со стратешкиот партнер за изградба на Коридорите 8 и 10-д од „Бехтел и Енка“.
„ВМРО Народна партија, бидејќи договорот за изградба не е достапен официјално, истакнува и бара од Владата да го објави договорот или да го презентираат на коморите, стручните здруженија и невладини организации од оваа дејност и да објасни дали измените и дополнување на законите се содржани во Договорот како обврска на Владата“, рече Балковски.
Тој побара и појаснување дали ако предложените измени и дополнувања на законите не бидат усвоени од Собранието, Владата ќе треба да плати финансиска отштета на стратешкиот партнер и колкава би била финалната цена на проектот во таков случај.
Од владата засега нема реакција на барањата на опозицијата, вклучувајќи го и вчерашното тврдење на потпретседателот на ВМРО-ДПМНЕ, Александар Николоски, кој изјави дека Владата се обврзала да ѝ плаќа огромни пенали на компанијата „Бехтел и Енка“ доколку работната недела не се зголеми од 40 на 60 часа во период од 45 дена од потпишувањето на договорот.
Предложените измени и дополнувања на осум закони вчера ја поминаа првата фаза на читање во Собранието. Станува збор за Предлог на закон за дополнување на Законот за земјоделско земјиште, како и предлозите за изменување и дополнување на Законот за експропријација, на Законот за урбанистичко планирање, на Законот за минерални суровини, на Законот за работни односи, на Законот за шумите, на Законот за градење и на Законот за утврдување на јавен интерес и номинирање на стратешки партнер за имплементација на проектот за изградба на инфраструктурните Коридор 8 и Коридор 10д. Од дневен ред единствено беше повлечен предлог-законот за изменување и дополнување на Законот за заштита на културно наследство.
Собранието во прва фаза ги усвои законските измени за изградба на автопатите
